الحياة مكتوقفش بسباب شي كائن ، و لكن النظرة للحياة كتتأثر بوجود من تحب من عدمه. جات عندي صاحبتي الأنتيم بعدما دورت ليها و شكيت عليها شنو خوّرت ، جربات تعيّط للمدام من رقمها و حتى هي ماجاوباتهاش ، اقترحت نخرجو نقلبو عليها ، ضحكات و قالتلي _ هدى ماشي دري صغير خليها تبرد و غادي تهضر معك كنّا داك الليلة معروضين ل "پرايد پارتي" ايه آخاي حفلة مية فالمية مثلية . كنسلت الموضوع من راسي حيث كنت معروضة للحفلة مع مراتي ، دبا مابقى معنى نمشي بلا بيها و لكن صاحبتي بززات علي ، و حلفات متتحرك إلا و رجلي على رجلها ، و فعلا تتمتع بقدرة هائلة ع الاقناع ، غير مية فحالها كون طيحو القانون 489 . حطاتني فالصالون و مشات تتقدى بّيرات باش نفتتحو الليلة قبل التوجه للقصارة ، درت مكياج ثقيل و جبدت عيني لصقت عدسات زورق حيث شعري عاد صبغتو بالزرق ، لبست صوارية قصيرة و لكن كلاس ، كنت باغية نبان أجمل وحدة فالسهرة و البنات يشوفو في بإعجاب باش نقلي لشي ناس السم واخا ماحاضرينش . نزلنا البحر بلاصينا الطوموبيل و جلسنا نبربرو ، بين كولا بيرة و اخرى كنصوني لهدى علاه و عسى قلبها يحن، و كالعادة مكتجاوبنيش، كندخل للواتس نسجل ليها اوديو و ندوز للفيسبوك نشوف اخر ساعة كانت اونلاين، و واش بوسطات شي حاجة ؟ غير ناخذ فكرة فين كاينة و كيفاش المورال ديالها و لكن مكنلقى والو للأسف، شربنا ربعة البيرات للوحدة و شدينا الطريق للهرهورة . ريحة البحر كتشهيك تعنق حبك من اللور و كتشوف فالأمواج على أنغام موسيقى لاتينية. شعلت گارو و خرجت يدي من شرجم كيفما كدير هدى فاش كنكون راكبة فالطوموبيل ، الطريق كلها كنقلب عليها بعيني و كنتمنى نكون غير كنحلم كالعادة و غادي نفيق نلقاها حدايا راسها تحت المخدة وواخدة الغطى كامل . وصلنا للڤيلا ، كون كانت مراتي معايا كنت غنشوف الليلة هاكا . الڤيلا من الدخلة باينة فخمة و الجردة كلها ضواو ، فيها جوج كلاب بيرجي ، كتحس براسك داخل لديزني لاند ، پيسين كبير و نقي ناس متفرقين كولا مجموعة شادة الهيت فقنت ، الفراش راقي و متناسق ، الصالون مزين بطابلوات باينة مختارة بعناية ، دايرين أكواريوم قد السخط فالصالون و التيم د الدزاين غالب عليه اللمسة الاستوائية . سلمت على اللي كنعرف و عجبني الحال فاش البنات علقو ع اللوك الجديد د شعري ، طبلة طويلة واخدة بلاصة كبيرة فقلب الجردة ، فيها كل ما تشتهي الأنفس من أكل و مشرب و قطيعات بالأشكال ، الحاضرين كلهم كليمينيات زوينين ولابسين آخر الحطات و كيضحكو بالقياس ، و دراري مثليين "ماشي قحاب" ، كتقدمني صاحبتي للناس كنسمع غا الباء المقدس كيتشير و الكنيات الثقال ، وايلي هذشي كاين فالمغرب ؟ ناس عايشين العلمانية المطلقة وراء سُور الڤيلا و شعيبا باقي مطايف مع ماركيز مهرّس و تلصيقة نص نص عاصر عليها من الصباح و حاضي نهيلة بنت الجيران معامن كتمشي و فوقاش كترجع ( فالمغرب كتعيش الحرية على قد بزطامك ) . دخلنا فالمود و تخلطنا مع الناس كلشي عايش ، الكاس كيدور و الموسيقى شاخدة ، سخنت مزيان و دخلت استحوذت ليهم على لابيست حسّيت راسي من المغرب و خرجت حتى من راسي و سافرت لمكان اخر ، بعيد عن الكراهية و العقد النفسية ، هذشي كله مكانش و ماشفتوش حيث المدام غايبة و بغيابها كلشي كيفقد البنة . الڤيلا فخمة لدرجة البسالة و الدخلة ديالها كتحسسك بعدم الارتياح ، كتخليك تشوف راسك داخل لعالم مكتنتميش ليه ، و كاين فوارق طبقية ضخمة ميمكنش تسايرها ، كيبانو لي القرودة كينقزو عاطيين قيمة لكرورهم أكبر من حجمهم الطبيعي ، موسيقى مجهدة كضر فالودنين ، و بنات مجموعين كيمارسو هوايتهم المفضلة "العياقة" تيليفون لينا كبر من نوسة ، و شفايف كارول صغر من شروق اللي عاد نفخاتهم فتايلاند ، الكيراتين اللي دارت نهاد غالي على ديال اسلام ، كتنقز اسلام و تقوليهم بزعطة الكيغاتين انا خذيت پورش جديدة ، مجموعة كلونات كيحاولو يلقاو معنى لأزمتهم الوجودية ، ما بغيت نسلّم على تا شي قرد باش ما يسولونيش على هدى و اللي ذكرها كنقول ليها عندها شي شغل فكازا الا سالات بكري غتجي عندنا ، بقيت كنعاود فهذ الكذبة حتى تيقتها . شدِّيت كاس وشديت واحد الفوطوي فالقنت و بقيت كنتفرج من بعيد ، شي عايش الحب مع صاحبو شي كيلعب البيانو ، كليكا اخرى جالسة كتسطّر ، جراتني صاحبتي و طلعنا للطواليط سطّرنا بالتخبية على جمتها حيث مانعة عليها هذشي . مورا داك السطر سحيت من الشراب و بديت كنحس بالوحدة عاوتاني خرجت كنتمشى فالجردة جبدت التلفون ندور ليها عاود مجاوباتش وانا نرمي ربو فپيسين، شوية وقفات على واحد الميمة تقريبا غتكون أربعينية و لكن مهلية فراسها كتبان حسن من العشرينيات ، فورمة متناسقة إجمالا مع بعض التضاريس الخلفية البارزة ، ميلف من الملفات الثقيلة ، دايرة بارفان فحال د هدى (هااح حركات ليا السواكن) سلمات علي ، و بدينا كنتعارفو ، شوية و هي تقولي _ عجبتيني و بقى في الحال هذ الزين يبقى فالجردة بوحدو و حاسة بيك قنطتي فهذ الحفلة _ آه الصراحة مليت . _ ايلا قبلتي عراضتي نكملو الليلة فداري ، عندي قرعة د بيلڤيدير تستاهلها غير شي غزالة فحالك … يتبع روابط الحلقات السابقة الحلقة 20 الحلقة 19 الحلقة 18
