باش تعطي لواحد ماعارفش آش واقع فالريف يختار الاعلاميين لي غيمشيو يغطيو حضور اللجنة الوزارية مع إقصاء جميع المنابر الاخرى حتى من الإخبار ماشي من الدعوة، فراه كاين قصر النظر كبير فهادشي. "كود" علمت أن مول لفضيحة ماشي وزارة الداخلية، وإنما وزارة الاتصال لي فيها وزير مافاهم تا وزة فقطاع الاعلام ولا الثقاف هادشي لي خلال عبد الاله تهاني مدير مديرية الاتصال والعلاقات العامة فوزارة الاتصال يشد ملف إستدعاء الصحافيين لي غيرافقو الوفد الوزاري، السيد ناض مشا إستدعى تقريبا شي 22 صحافيا فيهم صحافيين لي كيكتبو عليه مزيان فجرائدهم. السيد خدم راسو ماشي الدولة. خدم مصالحو ماشي مصالح المغرب العميق ولا السطحي. واش قضية الريف قضية وطنية ولا دولية. ها التخربيق لكبير اللي كيغدي الانفصال كيغدي التقسيم كيغدي امور خطيرة على الوطن. الحسيمة وحراكها موضوع مغربي مغربي الاجانب يمشيو لا يبقاو ماشي قضية الدولة المغربية تخصص ليهم طائرة ومنين هاد لفلوس ومع من تشاورتو. طبعا بالاضافة الى هادوك ديال برا كاين ديال الداخل وهادي فيها كثير باك صاحبي وخويا ودرتي لي وعاونتيني. وسائل الاعلام كتنقل وجهتي النظر و"كود" كيف كتنقل وجهات نظر الحراك كتنقل حتى محاولات الدولة لإيجاد حلول للازمة، و"كود" وغيرها من المنابر الاعلامية لي مخبروهاش مستعدة تتنقل على نفقتها مامحتاجاش شي حد يشد ليها الطيارة للحسيمة، ولكن الواجب هو الإخبار وتعطى هاد المسؤولية لناس مسؤولين ماشي لناس كيفكرو كيفاش يردو الجميل برهن الدولة فقضايا كبيرة. وهاداك تهاني راه ماشي ديالك هاديك الوزارة وماشي من حقك كاع تتدخل فخدمة الصحافة وتوجهها وتختار اللي بغيتي وتعرض على اللي بغيتي.
