اكد الإسباني خوان كارلوس گاريدو مدرب اتحاد العاصمة الجزائري ان الفريق ما عندوش حل آخر، من غير انه انه يربح نهضة بركان باش يتأهل لفينال كاس الكونفدرالية الإفريقية، وقال ان الحلم ديالو هو برح اللقب الثالث له كمدرب فكاس الكاف، وان هدف العاصمة ما بقى عندو ما يخسر بعدما ضاع له كاس الجزائر. وهضر الاسباني خوان كارلوس گاريدو خلال الندوة الصحافية اللي كتسبق ماتش نهضة بركان واتحاد العاصمة وقال: "الهدف ديالنا هو نربحو ونتأهلو للفينال باش نربحو اللقب، كاس الكونفدرالية مسابقة مهمة بزاف بالنسبة لنا ولجمهورنا وتركيزنا كبير على هذا الماتش باش نعوضو نتيجة ماتش الذهاب اللي ما تلعبش وكلشي عارف شنو كان وقع فيه". وكمل گاريدو وقال: "حنا لعبنا دومي فينال كاس الجزائر الاربعاء اللي فات وضيعن التأهل للفينال فالبيلانتيات وتقبلنا النتيجة وهادي هي الكورة، وهذا الشي غيخلينا ندخلو ضد نهضة بركان باش نربحو ونتأهلو للفينال ونربحو كاس الكونفدرالية، نهضة بركان فريق كبير وعندو امكنيات كبيرة والتجهيزات هنا فالتيران مانيفيك وجينا باش نربحوهم وندوزو للفينال باش نربحو اللقب". وزاد گاريدو بطل كاس الكاف 2 مرات مع الرجاء والاهلي الماصري، ووضح: "بالنسبة ليا الهدف ديالي نربح لقب كاس الكونفدرالية الثالث ليا، بعدما سبق ليا وربحت اللقب مع الرجاء الرياضي والاهلي المصري والحلم الشخصي ديالي هو نربح هاد اللقب لثالث مرة".
