[email protected] علمت “كود” من مصادر حقوقية موثوقة، أن المجلس الوطني لحقوق الإنسان الذي ترأسه أمينة بوعياش، قد وزع سيارات رباعية الدفع على رؤساء اللجان الجهوي بلوحات ترقيم “إم روج”. مصادر “كود” أضافت أن رؤساء اللجان الجهوية لجهات المملكة الجنوبية قد توصلوا بسيارات رباعية الدفع من نوع “هيونداي” بترقيم “إم روج” وذلك في سياق الإمتيازات التي يحظون بها والمتعلقة بالتنقل. دابا واش معقول مؤسسة كتقول بأنها مستقلة تعطي للموظفين ديالها سيارات بلوحات ترقيم “إم روج”. دابا كيفاش يفرق المواطن العادي بين الباشا والقايد والموظف فالمجلس الوطني لحقوق الإنسان. ما يمكنش لمؤسسة كتروج بأنها مستقلة تدير هاد الخطأ الكارثي لي كيضرب صورة حقوق الإنسان فالمغرب وفمنطقة الصحرا لي فيها توتر كبير. كيفاش دابا غادي نقنعو الأممالمتحدة والمقررين ديالها والمبعوث الشخصي القادم أن هاد المؤسسة محايدة وهي دايرة لوحات ترقيم ديال الدولة. وكيفاش غادي نقنعو المواطن بأن سيارة رئيس اللجنة لي كياخد شكاياتو من بعد شي توتر ما خدامش مع الدولة ومستقل وهو سايكَ سيارة ديالها. مول هاد الفكرة ماعندو علاقة بالمؤسسات المستقلة ولا الحياد لي كنقلبو نديروه فالصحرا ويديروه اللجان الجهوية فهاد المنطقة الحساسة لي بإمكانها تزيد بينا للقدام فالمقارعة الحقوقية مع البوليساريو وبإمكانها ايضا تردنا سنوات ضوئية للوراء ببحال هاد القرارات الخاوية. رؤساء اللجان الجهوية وخاصة فالصحرا خاص تكون عندهم شخصية ورؤية ويرفضو هاد الإجراء اذا كانوا فعلا كيبغو لبلاد وكيحرصو على مصلحتها فالحرب الحقوقية لي كتدور. وما يخلوش شي حد يوجههم ويدخل فقراراتهم بحال لي كيدير عبد المجيد بلغزال لي نصب راسو الآمر الناهي فكلشي وما يقدروش رؤساء اللجان الجهوية ديال الصحرا يديرو أي اجراء إلا من بعد العودة إليه بحال الى كان دوز الحبس مع مانديلا فزنزانة وحدة.
