واش مولاي حفيط العلمي رجل الاعمال ووزير التجارة والصناعة والتكنلوجيات الحديثة الاقتصاد الرقمي بغى يشري “اخبار اليوم” وباقي صحف اخرى لمجموعة توفيق بوعشرين اللي مشدود فقضية شوهات غير لبلاد. وفق مصدر “كود” من مجموعة مولاي حفيظ العلمي نفى هاد الشي وقال ل”كود” “هاد الشي كذوب ما عمر شي اتصال كان”. مصدر اخر قال ل”كود” من مجموعة بوعشرين ان كل ما فالامر ان المشاكل المادية اللي كتعرفها المجموعة٬ طلب بوعشرين من ناس قرابين منو يعرضو المجموعة على بعض رجالات الاعمال باش تستمر وتخرج من الازمة اللي فيها بسباب رفض المعلنين نشر اعلاناتهم فيها واخا حافظات على مهنيتها واستقلاليتها. مصدر “كود” ان من بين الاسماء المقترحة كان اسم مولاي حفيظ العلمي وطبعا اخرين. المصدر قال ل”كود” ان المبادر كان صحاب بوعشرين لقراب. بخصوص واش كان اتصال مباشر بمولاي حفيظ قال المصدر ان الرسالة وصلات ليه وما عمرهم تلقاو شي رد. كيفاش وصلات هاد الرسالة واش بوسيط ولا مباشر؟ المقرب من مجموعة مولاي حفيظ نفى ل”كود” حدوث شي اتصال.