قرر القضاء اليوناني، اليوم الأربعاء، تخفيف الحكم اللي صدر فحق الناشط والحقوقي المغربي حمزة هدي، من ربع سنين ل13 لشهر، وهذشي من بعد ما تم الطعن فالحكم لي صدراتو محكمة “كومونيتي” لبارح. ووجهات محكمة “كوموتيني” فاليونان لهدي اليوم تهمة الدخول لليونان بشكل غير قانوني، وتم الحكم عليه ب13 شهور فقط، وإسقاط تهمة الاتجار فالبشر. واعتقلات السلطات اليونانية هدي بعدما كان كيحاول يهاجر لأوروبا عبر اليونان، وكانت موجهة ليه تهمة الاتجار فالبشر، قبل ما يسحبها القضاء اليوناني منو اليوم، على اعتبار انه سنا مجموعة من المحاضر المكتوبة باليونانية غير بزز، واخا ماكايعرفش لهذ اللغة. وللإشارة، كان تشد حمزة هدي فالأراضي التركية ف22 يوليوز العام اللي فات، هو وصاحبو محمد حدار، بعدما فشلو فاقتحام الحدود اليونانية ومحاولة دخولة أوروبا عبر اليونان، واتهمو هدي بفركة ملفات الاتجار في البشر، باش يتم إسقاط طلبو في اللجوء السياسي اللي كان تقدم بيه. وكان دوز حمزة هدي، ناشط 20 فبراير، الحبس فالمغرب، بعدما اعتقلوه فمسيرة دارها فحي البرنوصي فكازا سنة2011، وكان خرج، وعاودوا اعتقلوه مرة أخرى فمسيرة فاتح ماي العام اللي فات، وهذشي خلاه يطلب اللجوء السياسي، ويتوجه لليونان.
