الدكتورة مريم أصياد، د. نورالدين بن يحيى ما بخلتوا، ما تساومتوا، صارعتوا، قاومتوا الحمّى، العافية، بلا ما عمّرها تجيكوم للبال، واش نخروج من هاد الحرب مْعادل، خاسر، لأن كل واحد منكم، حرفتو، ناسو حبّ، كان كبير، صغير، عندو، ما عندوش، روح الواجب بوصلة فى الليالي، الصيف، الخريف، هادي هي الوطنية، الرّجلة، ولوْ حتى أجمل نهار فى الصيف، غادي إتبعو الخريف بغينا، كرهنا، هادا القدر، ثقيل، سخيف، علكة هاد الضيف، ما عرض عليه حدّ، ما قالّو حدّ بْرك، مربحة بيك، دخل للجامع ببلغتو، بلا ما يتوضّى، ما عرف شقيق، كيعمل اللي بغى، خْدا هادا، لاخور معاه، حنا محتاجين فى وقت الشدّة المعرفة، العلم، عاد كيبان شحال ثمين.
جْناح القدر خداوْكم، حجبوكم علينا، على النور، الكون، باقييين فى قلوبنا، على يدّيكم جات الفرحة، الفرج، الميمون، شحال من واحد تشافى، تعافى، طلب من الله القدير، المجيب يحفظكم للاهلكم، للبشرية جمعاء، كان بعيد ولا ّ قريب، لأنه اللي فى القلب، بلاصتو مضمونة، بالود محصونة، بالعطف، بالمرحمة، المواساة، التحنن، بالرقة مقرونة، اللي فى الجوارح، القلب، ديما فى القلب، فى الذاكرة، طال الزمان، عملات اليدين، الرجلين المحاين قصيرة.
الأبطال ديما أحرار، ختارهم القدر، ديما قدوة، نور، قْطيرات خدودنا تمنّاوا ليهم السعادة وقت العبور، المودة، الإخاء، الحب لهيب كتاسح الخضر، اليابس بالورد مفرّش، تخدّر، ريحتو الفوّاحة، حُلة جديدة لابس.
بزاف بيهم، لا من مقدمين، قيياد، قايْدات، فرمليات، رجال النظافة، شْيافر، دوّروا العجلة، ستحقوا هديات، رماوْهم المواطنين بالورد، العطف، بلهجة، لغة جديدة ما عمّرنا سمعنا، كولّها شوق، أمنيات سْديدة.
لالا ّ مولاتي، ماشي عقاب، ولاكن مغزى، هدف الحياة، هاد الشي كان دارْكو الدكتور بن يحيى، عارفاه الذات، بلا ما إخمّم ولا جوج مرّات، سوّلوه تعاونّا، تقهرنا، ردّ عليهم بروح وطنية عالية، تضحية، اليد فى اليد درْنا. كان يمكن ليه يستفد من التقاعد المريح، بلا حريق الراس، ولاكن هادا وطني مثالي، ضحّى بأعز ما عندو يا ناس، راجل نموذجي، بحال النجوم إيلا بغيتي تلمسهم، تقبطهوم، عملية مستحيلة، ولاكن يمكن ليك تتاخدهم بوصلة المحروم، ما مشى لا ضحية، لا هباء منثورا، هادا، هادوا أبطال ماشي نظرا للقوة عضلاتهم، ولاكن للقوة قلبهم، اللي نال حب الناس، لبسوا كسوتهم، خدموا، المواطن عندهم عزيز، مكرّم، عليه فداوْا ذاتهم، عمرهم، صلب الإهتمام، التركيز. الله يرحم أرواحهم الطيبة، الراقية!