السعودية سمحات بأداء العمرة بشكل تدريجي ابتداء من 4 أكتوبر بالنسبة للي ساكنيت فالنفوذ الترابي دالسعودية، ومن مور شهر بالنسبة للأجانب والزوار، وهذشي من بعدما كانت حابساها من مارس اللي فات بسبب كورونا. وحسب وكالة الأنباء السعودية "واس"، غادي يتم أداء العمرة من طرف المواطنين والمقيمين بنسبة 30 فالمية من الطاقة الاستعابية دالحرمين الشريفين، مع مراعاة الإجراءات الاحترازية، (6 آلاف معتمر فالنهار). وف18 أكتوبر غيسمح ليهم أداءها بنسبة 75 فالمية، وعاد فالمرحلة الثالثة فنونبر غيسمحو لكلشي بأداء العمرة مع مراعاة الإجراءات الوقائية (مقيمين وأجانب)، وفالمرحلة الرابعة إلى قلالو مخاطر كورونا عاد غتقرر السعودية برفع الطاقة الاستعابية ل100 فالمية. وبالنسبة للأجانب، فغيمكن يديرو العمرة غير المواطنين اللي جاو من دول قررات وزارة الصحة أن تأثير كورونا فيها منخفض، وماكاينش فيها مخاطر صحية. وكان سبق للسعودية نظمات الحج هذ العام فظروف استثنائية، بحيث شاركو فيه غير السعوديين والمقيمين، ووصل عددهم ل10 فرد فقط.
