سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
واش بوريطة تسطا ولا بغا يخرج الغضب ديالو والفشل ف موظفي البعثات الدبلوماسية والقنصلية بالخارج؟ مذكرة عبودية خرجات هاد الصباح كتبين نظرة هاد الوزير للأطر الديبلوماسية اللي طلب منهم يخدمو بدون عطل وبدون انقطاع طول الصيف وعلى مدار الأسبوع
هاد صباح الأربعاء 16 يونيو نزلت مذكرة بوريطية كالصاعقة على موظفي البعثات الدبلوماسية والقنصلية فالخارج، كيبغي فيها بوريطة العطلة الصيفية ولنهاية الأسبوع لجميع الموظفات والموظفين بجميع القنصليات والسفارات المغربية عبر العالم في ضرب واضح بجميع حقوق الموظفين اللي كيضمنها ليهم قانون الوظيفة العمومية ، باش يبين باللي راه خدام ف توجهات الملك ومنها يغطي على أخطاؤه الكثيرة وفشله المشهود عالميا. المذكرة كتقول باللي جميع الموظفات والموظفين خاصهم يخدمو من الثامنة صباحا الى السادسة مساء يوميا وحتى ف السبت والأحد، كيفاش هاد الموظف غ يقدم خدمات ذات جودة بهاد الشكل، وعلاش أصلا هاد التعليمات ف الوقت اللي اغلب افراد الجالية جاية المغرب وما كانش عمل كثير مع إلغاء الرخصة الإستثنائية للسفر؟ استياء كبير في جميع القنصليات والسفارات اللي اعتبروا أنه بدل ما يشكرهم بوريطة على العمل طيلة فترة جائحة كورونا كينتقم منهم حيث كيكره الأطر وعندو عقدة من زمن كان موظف صغير مأمور. إضافة إلى ذلك موظفات وموظفين حسوا بالحكرة والتمييز حيث طلب منهم البقاء ف الخارج والعمل بلا يقدر بأن هناك موظفين قطعوا تذاكر السفر وعندهم اهل واحباب خاصهم يشوفهم يعد طول غياب منذ بداية كورونا. بوريطة كيعرف يعطي الأوامر ويتعسف على الموظفين لكن فيما يخص التعويضات والحقوق ما كيكلمش عليها حيث الموظفين مسالمين ما عندهمش نقابات يدافعوا عليهم، وحيث انه بغا يبين للفوق بالي راه خدام مع توجهات الملك ولكن واش الملك يقبل شي حد يتعسف على ابناء شعبو وعلى القانون بهذه الطريقة الإستعمارية؟ لا ابدا حاشا ولله .