ادان محمد يوسوفو سفير الكاميرون في المغرب وعميد الديبلوماسيين الافارقة اليوم فالرباط٬ الجهات اللي كانت سباب فما حدث فمعبر مليلية من احداث ماتو فيها لحد الان حسب بيان للسلطات المغربية 23 مهاجر. السفير الكاميروني قال ان السلطات المغربية وراتهم فاجتماع اليوم فوزارة الخارجية والتعاون فيديوات وصور فيها عنف كبير. واضاف ان الاحداث كانت قاتلة حقاش هادوك المهاجرين اللي كانو مسلحين٬ كيف قال٬ باسلحة بيضاء وبالعصي٬ عوض ما يمشيو ينقزو من السياج اللي دارتو السلطات الاسبانية٬ دازو للمعبر الحدودي اللي كان مسدود. هنا٬ يضيف كبير الديبلوماسيين الافارقة في المغرب٬ وقف زحام وعفيط واختناق ومات اللي مات. السفير الكاميروني قال ان وراء هاد الشي عصابات ومسلحين كيجيو من بلدان فيها صراعات وكيكونو مدربين وعليه عبر عن رغبتو ورغبة دول افريقية باش يساعدو المغرب ويواكبوه لايجاد حل لهاد القضية ديال الهجرة وكانت وزارة الخارجية عرضات على السفراء الافارقة وجابت الزروالي الوالي المكلف بالهجرة وقدم عرض على ما حدث فبني انصار هادي يومين
