إنفانتينو: ها شنو وقع ليا مع أشرف حكيمي والعالم كامل صبح مغربي فالمونديال

كشف رئيس الاتحاد الدولي لكرة القدم "الفيفا" جياني إنفانتينو أنه تجاوز هو والدولي المغربي أشرف حكيمي الخلاف اللي وقع بينهم من بعد ماتش الترتيب فكأس العالم قطر 2022، السبت الماضي، ما بين المغرب وكرواتيا. وأكد أن حكيمي عزيز عليه وأنه من الأحسن يتم التركيز على المستوى الرائع اللي قدم المنتخب المغربي فالمونديال فبلاصة الحديث على التحكيم.
وقال رئيس الاتحاد الدولي لكرة القدم "الفيفا" خلال حوار على قناة الكأس القطرية: "انا أحب أشرف حكيمي راه لاعب كبير وجا اعتذر مني وفالماتش راه الواحد يقدر يقول شي حاجة ما كيكونش باغي يقولها".
وبخصوص احتجاج اللعابا ديال المنتخب الوطني المغربي على التحكيم قال رئيس "الفيفا": "فبلاصة ما نتكلمو على التحكيم، راه خاصنا نركزو على الأداء الواعر ديال المنتخب الوطني المغربي، راه المغرب لعب بطريقة عظيمة وقدم كرة رائعة وخاصنا نوهو بمستوى المنتخب المغربي واللعابا ديالو فحال حكيمي وزياش واللعابا المغاربة كاملين والناخب الوطني المغربي وليد الركراكي المدرب الشاب الرائع اللي جعل هاد المنتخب يلعب كرة مميزة وعندو دفاع قوي حارس مرمى واعر فحال ياسين بونو".
وكمل رئيس الاتحاد الدولي لكرة القدم "الفيفا" وقال: "المغرب مثل في كاس العالم قارتين حيث لعب للعالم العربي والقارة الإفريقية وقدرو يتأهلو لنصف نهائي كوب ديموند وكاين اللي كيقول أن هذا الأمر كان مفاجئ، أه راه يقدر يكون مفاجئ ولكن ملي كتشوف الأسماء اللي عند المنتخب المغربي والكاريير ديالهم وديال المدرب والجمهور المغربي غادي تعرف أن هادشي جا بالخدمة، والمغرب صبح المنتخب اللي كيشجعو الجميع بغض النظر على الجنسية ولمس قلوب العالم".