نهاية الأسبوع داز عرس خيالي فمدينة العيون وهو عرس بنت رئيس مجلس المستشارين النعمة ميارة مع رجل أعمال من قبيلة اولاد ابي السباع موريتاني الجنسية. هاد العرس تخسرات فيه فلوس كثيرة، ولكن أهل الرشيد ما خلاوهش يدوز مرور الكرام بلا ما يستاغلوه سياسيا. أولا العرس تقسم على جوج أجزاء الجزء الأول قبل العرس ودار فيها حمدي ولد الرشيد رئيس جماعة العيون عراضة لاولاد الدليم فاش جاو هاد العراضة دارت فدار محمد ولد الرشيد ولد حمدي، وحضروها أعيان وشيوخ قبيلة اولاد الدليم ومن ضمنهم أهل حرمة الله وجابو معاهم تكبيرة لأهل الرشيد بمناسبة هاد الزواج. خلال هاد الجزء الأول من الحفل دار حمدي ولد الرشيد عراضة كبير على شرف قبيلة اولاد الدليم وعطاهم هدايا تذكارية فيها بزاف ديال الرسائل واخا هي مقتبسة من جيست كان دارو الملك الحسن الثاني مع الجماني فاش عطاه سلهام، بحيث عطاهم ليهم كمجاملة وباعتبارها إشارة لقيادة اولاد الدليم للشأن السياسي فجهة الداخلة واعتراف بقوتهم وبالضبط عائلة حرمة الله بعيد على الخطاط ينجا اللي ماجاش واخا من نفس القبيلة، وممكن تعتابر هاد الزيارة بداية لتحالف سياسي ممكن يكون مستقبلا، ورد للحفل ديال استقبال اولاد الدليم لولد الرشيد فالداخلة قبل شهر من دابا. ندوزو دابا للجزء التاني ديال حفل الزفاف اللي تقام خارج مدينة العيون شرقا فطريق السمارة عند ابراهيم ولد الرشيد خو حمدي ولد الرشيد وأب سيدي حمدي ولد الرشيد رئيس جهة العيون، وجَد البنت اللي مزوجة. العرس استاعنو فيه أهل الرشيد بفنانين من موريتانيا أجورهم أكثر من 100 ألف درهم للحفل بحال گرمي منت آبا وسدوم وغيرو، بالإضافة لمغنيين مغاربة، ولكن الحفل شهد إنزال ديال الطلابة من موريتانيا وهاد الناس عندها كونطات فسناب شات وانستاغرام وكدير خدمة الترويج لشنو وقع فالعرس وكياخدو أجور كبيرة بزاف تقدر توصل ل 100 ألف درهم وكثر فقط من عند عائلة العريس أو العروس بلا ما نحسبو التمجيد ديال الأشخاص الآخرين والقبائل وكلها كيحط بحال الغرامة باش تگال سميتو بأنه عطا لفلوس أو جاب تكبيرة أوأنه مزيان او أنه كريم. العرس وصل فيه أكثر من 200 جمل وناقة كلها تكبيرات وهدايا من عند العائلات والقبائل الصحراوية فالعيونوالسمارةوالداخلة وبوجدور وكلميم وغيرو، بالإضافة لمبالغ مالية كبيرة تجاوزات فبعض الأحيان مليون ديال الدرهم لفائدة أهل الرشيد بصفة عامة وماشي للنعمة ميارة بوحدو، لأنه دايز فقط فوجه أهل الرشيد لأنه مزوج أخت رئيس الجهة حمدي وبنت ابراهيم ولد الرشيد خو حمدي رئيس جماعة العيون. العرس على حساب التقديرات حضرو أكثر من 5000 شخص من المغرب وموريتانيا، وكان الصداق فيه على حساب ما تگال 1 مليون ديال الدرهم من عند العريس. الحفل على حساب اللي شافو ناس العيون خلق رواج كبير فالمدينة وهادشي يمكن أي حد يلاحظو فالسيارات تويوتا اللي كدور فالمدينة وأغلب لوحات ترقيمها موريتانية، بالإضافة للطيارة كانت عامرة وكلشي ريزيرفي والسيركيلاسيون ديال طوموبيلات ميرسيديس. العرس حضروه قيادات حزب الاستقلال بحال مضيان اللي وصل على متن طائرة خاصة وبحال الأمين العام نزار بركة وعادل بن حمزة وغيرهم من قيادات حزب الاستقلال وجاو باش يجاملو ولد الرشيد خصوصا وأن مؤتمر الحزب قريب يدار من بعد شهر رمضان. العرس رافقوه إشاعات بزاف ديال حضور وزراء فالحكومة وكان تم ترويج حضور رئيسها عزيز أخنوش ولكن ما جاش لا هو ولا وزراء الحكومة، وحتى منتخبين معروفين ما جاوش بحال منتخبين من قبيلة إزرگيين فحزب التجمع الوطني للأحرار اللي كانوا أبرز الغائبين، على الرغم من حضور عائلات فإزرگيين بخيث جاو وعطاو التكبيرة ديالهم بشكل عادي. أبرز الغائبين على العرس كان خليهنا ولد الرشيد رئيس الكوركاس شقيق حمدي ولد الرشيد رئيس جماعة العيون وعم رئيس جهة العيون أي عم والدة البنت اللي مزوجة. العرس كان فخم بزاف وتحطات فيه فلوس صحيحة وأهل الرشيد أيضا، دخلو فلوس صحيحة، ولكن غادي تكون عندو تداعيات كبيرة عند ناس العيون والصحرا بصفة عامة بحيث كرّس هاديك الصورة النمطية ديال اغتناء أهل الرشيد وكيفاش قدرو ينظموه ومن فين قدر رئيس مجلس المستشارين النقابي النعمة ميارة يجيب فلوسو؟ العرس جا فوقيتة الناس كتعاني فيه ماديا وهادو ما حتارموش هادشي وبالتالي فإن ناس العيون فاش كتشوف هادشي كتزيد تحقد عليهم وكيزيد منسوب الكره تجاههم، كاين الفقير كيشوف وكاين المريض لي ما عندوش باش يداوي راسو كيشوف الفلوس كتشتت وكاين لي ما معشيش وكيشوف ما لذ وطاب محطوط، تا حد ما يقبل يشوف معاناتو الاجتماعية وواحد جاي من موريتانيا ياخد لفلوس بيليكي بلا جهد. من حق أهل الرشيد والنعمة ميارة يفرحو ببنتهم، ولكن واجب يحتارمو الآخر وبلا شك هاد العرس غادي يتقلب عليهم وغادي تكون عندو تداعيات سلبية على صورة أهل الرشيد وغادي تكون عواقبو كبيرة عليهم سياسيا واجتماعيا وإنسانيا وسط ناس العيون.
