كيعرف الكلاسمون الجديد للأندية الأفريقية اللي صدر فهاد أبريل تواجد 3 أندية مغربية مع أحسن 20 فريق فالقارة الإفريقية، وهو اللي كيخليها وبنسبة كبيرة تشارك فالنسخة الجديدة من السوبر ليگ الإفريقي. رئيس الاتحاد الإفريقي لكرة القدم باتريس موتسيبي كان علن قبل أشهر، أن النسخة الثانية من بطولة السوبر ليگ الإفريقي غيتزادو فيها عدد الأندية المشاركة وغيوليو 24 فريق، بعدما كانوا فالنسخة الأولى اللي تلعبت عام 2023 غير 8 ديال الفرق وكان من بينهم فريق مغربي واحد هو الوداد الرياضي ووصل للفينال، وحسب آخر تصنيف ديال الاتحاد الأفريقي الخاص بالأندية الأفريقية واللي خرج فهاد أبريل، فالوداد الرياضي كيحتل المركز الثاني إفريقيا، والرجاء الرياضي كاينين فالمركز السادس ونهضة بركان فالمركز 10 وليفار كيحتلو المركز 15. ودابا كلشي كيتسنا طريقة اختيار الاتحاد الإفريقي للفرق المشاركة فالنسخة الثانية من مسابقة السوبر ليگ الأفريقي، وواش غيكون الاختيار من خلال التصنيف الإفريقي ديال الأندية، ولا عن طريق الكوطا ديال تقسيم الأندية المشاركة على مناطق إفريقيا شمال جنوب شرق غرب كيفما وقع فالنسخة الماضية وهي طريقة خلفت جدل كبير حيث عدد من الأندية القوية إفريقيا بحال الرجاء والزمالك ما شركوش وتعطات الفرصة لأندية أقل منهم فالمستوى وبزاف.
