واش الرجاء ما عندهاش رئيس قوي يدافع عليها ؟ .. الكاف باغي يرضي الخواطر فالسوبر ليگ بفرق ضعيفة على ظهر الخضرا

كيتواصل الجدل بخصوص مسابقة سوبر ليك الإفريقي اللي باغي يطلقها الإتحاد الإفريقي لكرة القدم، والاكتفاء بدعوة فريق واحد من المغرب فالنسخة الأولى ديال البطولة اللي هو الوداد الرياضي بطل إفريقيا، مقابل استبعاد الرجاء الرياضي اللي سيطر هو ونهضة بركان على كأس الكونفدرالية وكان متواجد فالسنوات الأخيرة فالادوار النهائية ديال عصبة الابطال وكأس الكونفدرالية، وبالمقابل مشاركة فرق من دول إفريقيا جنوب الصحراء أقل شعبية وقيمة جماهيرية وإمكانات من الخضرا اللي غير الاسم ديالها كيخلع فلافريك واخا مع المشاكل التسييرية الحالية تراجع مستواها شوية.
وحسب موقع "في الكول" المصري فالإتحاد الإفريقي لكرة القدم رشح 8 ديال الفرق باش تشارك فالسوبر ليك، وهي الوداد الرياضي، والأهلي المصري، والترجي التونسي، وماميلودي صن داونز الجنوب إفريقي، سيمبا التنزاني، مازيمبي الكونغولي، حوريا كونكري الغيني، بيترو أتليتكو الأنجولي.
الموقع المصري كشف أن معايير اختيار هاد الفرق جا بناء على التصنيف الأخير لأندية إفريقيا، والاتحاد الإفريقي كيشوف أن مشاركة 3 فرق فقط من شمال إفريقيا غتكون كافية لذلك تم اختيار أعلى ثلاثة منهم في التصنيف.
للإشارة فالترتيب الشهر الأخير ديال الاتحاد الدولي للتاريخ والإحصاء الخاص بشهر يناير الماضي، احتل فيه الوداد الرياضي المركز الثاني إفريقيا خلف الأهلي المصري المتصدر لترتيب القارة، وجاو الزمالك وبيراميدز المصريين فالمركز 3 و 4، شباب بلوزداد الجزائري خامسين.
وماميلودي صن داونز الجنوب إفريقي سادس، والرجاء الرياضي فالمركز 7، ومن بعد منو فريق نهضة بركان هو الثامن، والغريب أن بيترو أتلتيكو الانغولي وسيمبا التنزاني والترجي التونسي احتلوا المراكز 10 و 11 و 15 على التوالي وفريق تيبي مازمبي من الكونغو الديمقراطية ما كاينش مع ال 20 فريق إفريقي الاولين فالتصنيف.
وحسب عدد من المتابعين فهاد النسخة الأول من بطولة السوبر ليك الإفريقية غتعرف إرضاء الخواطر من الإتحاد الإفريقي لعدد من الإتحادات المحلية فإفريقيا، حيث ماشي من المعقول أن فرق كبيرة فحال الرجاء والزمالك المصري اللي دائما حاضرين فالادوار النهائية ديال العصبة وكأس الكاف يغيبو على السوبر ليك، وهادشي إضافة إلى تصنيفهم وشعبيتهم وامكانياتهم والبنية التحتية اللي عندهم، وتشارك فرق اضعف منهم وأقل منهم قيمة فكلشي.
التسريبات ديال الفرق المشاركة فالسوبر ليك الإفريقي خلقت جدل كبير، خصوصا أنها كلها كتجمع على عدم مشاركة الرجاء الرياضي وهادشي كيخلي الجماهير الرجاوية تسأل مرة أخرى على دور المكتب المديري ديال النادي برئاسة عزيز البدراوي، واش بالفعل قادر يحمي حقوق الفريق الأخضر فحال المكاتب السابقة ديال محمد بودريقة وجواد الزيات وغيرها اللي كانت كتنوض تدافع على مصالح الخضرا فالجامعة والكاف والفيفا وحتى فالطاس باش تجيب حق الرجاء اللي كيبقى أفضل فريق مثل كرة القدم المغربية ملي وصل لفينال كأس العالم للأندية 2013، وهذا إنجاز تاريخي مازال حتى فريق مغربي وإفريقي ما كررو من بعد "الرجاء العالمي".