العام لي غادين نودعوه من بعد أيام قليلة غادي يبقى مرسخ في أذهان العالم بسباب جايحة كورونا، وعند بعض المشاهير غايبقى مرسخ عندهم لاسباب اخرى منها دخولهم للحبس بسبب زبايلهم في العالم الافتراضي. – أول اسم دار الباد بوز هاد العام هو ديال ابتسام باطمة خت دنيا باطمة لي دخلات للحبس في مراكش بسباب تورطها في لافير ديال حسابات "حمزة مون بيبي" المتخصصة في سب وقذف المشاهير وحتى الناس العاديين، وكاين منهم لي خرجو ليه على حياتو، منهم الإعلامية المغربية مريم سعيد. – ثاني اسم هو ديال عيشة عياش لي متورطة في نفس القضية، وحتى هي موجودة حاليا في سجن الوداية في مدينة سبعة رجال. عيشة عياش كانت مستقرة في دبي وكتقدم راسها كمصممة. عيشة وابتسام وحتى دنيا كتجمعهم علاقة قوية وهادشي بينوه ما مرة ما جوج وهوما كيغنيو على "حمزة مون بيبي" وانجازاتو قبل ما تكشف التحقيقات أنهم حتى هما متورطات. – الاسم الثالث هي السيدة لي كتقدم راسها ب"مي نعيمة" ولي دخلات للحبس بعدما نشرات فيديوهات في الأيامات الأولى من جايحة كورونا وبدات تحلف وتعطي لقلبها وتقول ان الفيروس ماكاينش. نعيمة دوزات شي بركة ديال الحبس، وكان القضاء في الأول حكم عليها بعام قبل ما يتم تخفيف الحكم ل3 أشهر بتهمة نشر محتويات زائفة بواسطة الأنظمة المعلوماتية. – الاسم الرابع هو ديال البلوكَوز أسماء العمراني لي تم اعتقالها شهر أبريل بعدما دارت فيديو في انستكَرام كتقول فيه أن ضحايا كورونا في المغرب كيتعرضو للاهمال العمدي. العمراني لي عندها كثر من نص مليون متابع على حسابها دوزات شي أيامات في الحبس قبل ما يتم الإفراج عليها ومن تم تسد موضوعها بمرة. – الاسم الخامس والأخير ماعندو علاقة بكورونا، ودخول هاد السيدة للحبس خلا الناس متضامنين معاها لأنها معروفة في مواقع التواصل، وهي إيمان لبرج المعروفة ب"ناريمان" لي تشدات في قضية وضع شيكات بدون رصيد وعملية نصب كبيرة بمشاركة طليقها. قصة ناريمان مواضحاش، وكاين اتهامات كبيرة لراجلها بأنه هو لي حط شيك بدون رصيد باسمها بعدما طلقو.