كيسبق ماتش سدس عشر نهائي كأس العرش بين الكوكب المراكشي وحسينية أكادير، جدل كبير، حيث المراكشيين كيقولو أن جمهور الحسنية ما غيكونش حاضر فالماتش بسبب الإصلاحات اللي كتعرفها منصة الجمهور الضيف فتيران مراكش الكبير، والنادي السوسي كيقول أنه ما توصل بحتى شي قرار كيمنع الجمهور ديالو من حضور المباراة. وحسب الكوكب المراكشي اللي غيكون الماتش فتيرانو الخميس الجاي، فتذاكر المباراة ما غتكونش متاحة لجماهير حسنية أكادير، وضحو المراكشيين أن هاد الشي ولا فگاع المباريات اللي كيلعبها الكوكب المراكشي فهاد الفترة، بحكم أشغال التهيئة اللي كتعرفها الجهة الشمالية المخصصة عادة للضيوف، استعدادا لتنظيم المغرب لبطولة إفريقيا السنة المقبلة. حسنية أكادير ما تقبلوش هذا الشي، وقالو أنهم تفاجأوا تداول منع مشجعي النادي من الحضور للماتش، وأكدو أن هذا الشي خلف حالة من التذمر عند الجميع، وأنهم ما توصلو بأي قرار رسمي كيمنع حضور الجماهير خلال هذه المباراة، وقالو أن مباريات كأس العرش لها نظامها وضوابطها الخاصة، اللي كتفرض التنسيق القبلي والترتيب المشترك بين الناديين بما يضمن مبدأ تكافؤ الفرص وتوفير كل الظروف لإنجاح المباراة على المستويين التنظيمي والتقني، وأكدو الحسنية أنهم غيديرو مراسلة للجامعة الملكية المغربية لكرة القدم، لضمان حقوق النادي المشروعة خلال هذه المنافسة.