عبر هشام الدكيك مدرب المنتخب المغربي على الفرحة ديالو حيث المنتخب المغربي ربح زامبيا بنتيجة 13 لزيرو، فالجولة الثالثة من دور المجموعات ديال كأس أفريقيا وتأهل لدومي فينال المسابقة اللي منظمها المغرب، وأكد فنفس الوقت على ضرورة احترام أي ماتش وأي خصم، وأنه ما كيزيدش فيه ملي كيقول على شي مباراة غيلعبها أنها صعيبة، حيث گاع الماتشات صعاب وخاصهم التحضير والتركيز، وقال بلي الماتش الجاي ديال الدومي فينال مهم بزاف حيث مؤهل للمونديال. وهضر هشام الدكيك ملي سالا ماتش المغرب وزامبيا، وقال فتصريح له: "اللاعبين بداو كيولفو أجواء الجمهور وكيتحررو، وهذا كان أحسن سيناريو فماتش زامبيا، وملي كنقول راها مباراة صعيبة راه ما كنقصدش تمويه ولا شي حاجة اللي ما كيناش، وحتى ملي كنشوفو الأهداف اللي تماركات جات بمجهودات كبيرة من اللاعبين باش سجلوها يعني ما كايناش مباراة سهلة أو أن الأهداف غيتماركاو بوحدهم، وملي كنعطيو القيمة للمباراة راه كنعطيوها حقها وكنعطيو للخصم قيمتو وكنحتارموه باش ربما الأمور دوز كيفما دازت فماتش زامبيا، داكشي علاش أنا دائما أي ماتش كنلعبو كنعتبرو قوي وفيه احترام للخصم، والماتش الجاي مازال ما عرفناش مع من غنلعبوه، وغتكون المباراة مصيرية ومؤهلة لكأس العالم، وغنوجدو لها بنفس الطريقة". بخصوص أن المنتخب المغربي للفوتسال هو المنتخب ديال الكرة اللي كيفرح المغاربة بالألقاب قال هشام الدكيك: "هاد المسألة حنا واعيين بها، حيث هاد العام ما عوناش من ناحية الألقاب بالنسبة للمنتخبات الاخرى، ونتمناو أن الأمور تمشي مزيان، وعبر التاريخ المنتخب المغربي للفوتسال ملي كياخد شي لقب العام اللي من وراه كيكون فال حسن على المنتخبات الاخرى، بدينها ف2017 وبداو الإنجازات، وعاودناها ف 2020، وحنا مقبلين على كاس أفريقيا لكرة القدم النسوية وعلى كأس إفريقيا 2025، نتمناو نكونو فال خير باش 2024 و2025 تكون أحسن سنة فالتاريخ الرياضي المغربي".
