عبر السويسري جياني إنفانتينو رئيس الاتحاد الدولي لكرة القدم، مللي وصل اليوم للمغرب باش يحضر فينال مونديال الفوتسال، بين المنتخب المغربي ومنتخب أونگولا، اليوم الاحد فتيران مولاي عبد الله فالرباط، (عبر) على الفرحة ديالو حيث رجع للمغرب والافتخار ديالو بالمملكة المغربية. وملي وصل جياني إنفانتينو رئيس الفيفا لمطار الرباط سالا لقا رئيس الجامعة الملكية المغربية فوزي لقجع كيتسناه، وقال فتصريح له: "فرحان بزاف حيث رجعت للمملكة المغربية، اللي كنعتبرها الدار الثانية ديالي، والمغرب بلاد كيتنفس وكيبغي كرة القدم، وهذا الشي عاجبني بزاف وفخور حيث جيت للمغرب". وكمل رئيس الفيفا: "المغرب قوة ناعمة فالكورة العالمية وماشي غير فالنتائج بعدما كان دار إنجاز تاريخي فكأس العالم فقطر، ولكن المغرب راه ولا بلد كينظم تظاهرات كبيرة، ودابا منظم كأس إفريقيا للفوتسال، المؤهلة لكأس العالم". وزاد إنفانتينو: "والمغرب وبالإمكانيات ديالو كيلعب دور كبير باش يكون قادر على تحدي تنظيم مونديال 2030، وراه قادر على تنظيم هاد النسخة حيث عندو الإمكانيات وحنا فرحانين بالمغرب والانضمام ديالو للمشاركة فهاد التحديات ديال المستقبل اللي غتبدل صورة كورة القدم العالمية".
