الركراكي: الرباح كان مهم فماتش أنگولا.. وانا فرحان بدياز وبنصغير.. ورحيمي جاوبني فالتيران

اكد الناخب الوطني وليد الركراكي أن المهم فماتش الكونكو هو ان المنتخب المغربي ربح، حيث هذا هو اول ماتش ورا كوب دافريك، وكان ضروري يرجعو الثقة.
وقال وليد الركراكي بعدما ربح المغرب منتخب أونگولا: "فالشوط الاول تحكمنا وجاونا بزاف الفرص ولكن ما ماركيناش وبقينا فاللعب ديالنا وشدينا الكورة والدراري دارو داكشي اللي كنت باغي واخا كانوا بزاف ديال ليديشي تيكنيك".
وكمل الركراكي: "المهم هو الرباح والفرص اللي جاونا ومازال خاصنا نخدمو ليطا ديسبري كانت واللعب حتى هو ومن ورا كاس أفريقيًا كان خاصنا نربحو باش نرجعو الثقة وهادي هي المهمة".
وعبر الركراكي على الفرحة ديالو بالمستوى اللي بان به كل من برايهم دياز وإلياس بنصغير، فأول ماتش لهم مع المنتخب المغربي.
وقال وليد الركراكي: "براهيم دياز والياس بنصغير لاعبين اللي عندهم امكانيا وحنا فرحانين حيث جاو للمنتخب المغربي باش يعاونونا، خاصهم الوقت حتى هما باش يولفو ويلعبو مع الدراري، ودابا ثلاثة ايام كيخدمو مع بعضياتهم".
وزاد وليد الركراكي: "مازال خاص يلقاو التواصل مع بعضياتهم، حكمي زياش مع براهيم دياز مع إلياس بنصغير ومع اشرف حكيمي ومع عز الدين اوناحي، وغنخدمو على هذا الشي وخاصنا الوقت شويا.. اليوم بانت الكونيكسيىن بينهم وكيلعبو بيناتهم وفرحان ببراهيم دياز وإلياس بنصغير اللي غيعطيونا الإضافة فالمستقبل".
المستوى اللي قدم سفيان رحيمي عجب الركراكي، وقال أنه عطاه فرصة وبين له بلي يستاهلها.
وقال وليد الركراكي: "ماشي ساهل تدخل فهاد الماتش وكيف قلت خدم باش يرجع فهاد الفريق ويستاهل نعطيه الوقت يلعب وعطيتو الوقت وكيف كنقولو اللي كيجاوب فالتيران ديما كيعجبني وراني فرحان به".
وتألق سفيان رحيمي بعدما دخل كبديل، وكان ورا هدف الرباح ديال المنتخب المغربي.