"الزنقة كونطاكت"او كازا نيگرا صادقة لاسماعيل العراقي. الروك اللي نقدو من الموت فباطاكلون خلاه يحب كازا وفيه بان ممثل قافز بزاف اسمو احمد حمود

هادي 16 يوم والقاعات السينمائية فالمغرب فيلم مختلف قافز فيه السينما. فيه وجهة نظر واضحة لمخرج هادا هو اول فيلم طويل ليه. هاد الفيلم هو "الزنقة كونطاكت" لاسماعيل العراقي.
مول الفيلم القصير "لحرش" صور الفيلم هادي عامين ودار بيه فمهرجانات ومع هاد الجايحة٬ دابا عاد خرج فالقاعات.
فيلم على كازا. كازا كيفاش كيشوفها المخرج اللي تزاد فالرباط وديما ساكناه هاد المدينة. طبعا كازا تعطي فالسينما٬ خاصة صحاب "الاندرگراوند". اسماعيل العراقي اصلا مجنون على الروك. اختار شخصية من هاداك العالم اللي عزيز عليه. اختار يدير اوماج لباطاكلون بطريقتو. هو اللي تزگل من الموت باعجوبة نهار هجمو الارهابيين على هاداك المسرح الباريزي اللي كان فيه حفل الروك ديال المجموعة الكاليفورنية "ايگل اوف ديث ميتال" 15 نونبر 2015. تزگل باعجوبة. يعني الموسيقى قرباتو الموت ونقداتو فنفس الوقت. هاداك الهجوم الارهابي كان قتل 90 روح عاشقة للحياة للموسيقى.
هاد الشي اللي عاشو بان فالفيلم. روكور معروف رجع لكازا مدينتو الاصلية بعد ما هداتو المخدرات. لعب هاد الدور احمد حمود وغادي نرجعو لطريقة اداؤو الرائعة. غادي يتكونطاكتا فهاد المدينة مع قحبة عندها صوت واعر ولعبات الدور خنسا باطما. كونطاكت بدل حياتهم بجوج فمدينة كتجمع فيها البشاعة والجمال.
فهاد الفيلم لعب فيه سعيد باي قواد البطلة ولعب فيه رفيق بوبكر كليان ديال القحبة ومراد الزاوي خدام عندو وفاطمة عاطف هربات من هاد لقوادة وكازا ومشات سكنات بين الطبيعة.
اسماعيل العراقي صور كازا ديالو. كان صادق فيها مقارنة مع بعض المخرجين لمغاربة. صور اش كيعجبو هو. فين كيلقى راسو هو ماشي اش باغي الجمهور. كازا عندو كرو. خضرا عريانة. ما فيها الماكياج ولا الزواق. كازا كتولي عندو ثورة على حياتو اللي عاشها هو فالرباط وعلي قرايتو فديكارت. هنا الحياة ديما مخبية ليك شي حاجة. شي مفاجئة. ماشي بحال حياة ولد ديكارت اللي كلشي واجد ليه. مستقبلو واضح. علاقاتو واضحة. خدمتو باينة. ما كانش ڤيلگار. الشخصيات كتهدر باللغة ديالها. ما كانتش عندو مشاهد مجانية. مثلا فالمشهد ديال البطل غادي يضرب الگيتار ويعنق البطلة باش تغني. مشهد جنسي واعر بلا جنس. كلشي فالايحاءات دازت بطريقة سينمائية
هنا فين كان المخرج صادق فعملو السينمائي. هنا فين بان الفيلم متميز. كيشبه مولاه. اللي عاونو باش يعطيه هاداك الطابع الكازاوي بزاف هو الممثل احمد حمود، البطل الروكير. العراقي تمنى يكون هاد البطل.
الممثل هز الفيلم بزاف.
كيفاش طاقة بهاد القوة ما كتشاركش فافلام مغربية؟ الصحبة بين المخرجين والممثلين فالمغرب كتهمش امثال احمد حمود. دار افلام برا ولكن فالمغرب خدم فالمسرح. هو اصلا حياتو روكير حتى هو. ف"الزنقة كونطاكت" تخشى فالدور ماشي غير تمقصو. غمض عينيه وخلى الجسد ديالو يدخلو فعالم البطل. ما كانش محتاج يهدر بزاف او يغوت بحال ما كان كيدير ممثل اخر معاه فالفيلم اللي هو سعيد باي. طاقة واش من طاقة هاد الممثل. فالمشاهد اللي كيكون قدامو ممثل كتحس بالفرق بيناتهم.
فاختيار هاد الممثل نجح المخرج بزاف. مع الخنسا كانت طريقة اخرى للعب. استغل المخرج طاقتها الخام. دارت مجهود فهاد الفيلم. سعيد باي كان عادي ما قودها ما بدع شي ابداع كبير. يمكن وجود احمد حمود هو اللي خلاه بيان فهاد المستوى. كوريت.
فنانة اخرى جاية من المسرح وكيديرو بزاف هي فاطمة عاطف كيف ديما زوينة. كتلعب بصدق. ما كتغشش. الريتم كان كيطيح شوية مع بوبكر رفيق والزاوي مراد. كان يدار كاسيتن احسن. ما داروش مجهود كبير فاللعب خاصة بوبكر.
الممثلين والممثلات لخراين كتحس بمجهودهم.
هاد الفيلم ماشي تحفة سينمائية وفق معايير السينما المغربية. فيه مجهود. فيه خدمة. فيه مخرج واخد السينما بقلبو. داير مجهود ما كيتفلاش. هاد الشي علاش هاد الفيلم خاصو يتشاف