المسيرة الخضراء او الفضيحة اللي كتسيء لينا كمغاربة ولقضيتنا. ها علاش كنعيشو مرة مرة وضعية حرجة ف"الصحرا" حقاش كاينين بحال بريطل فالسياسة

ماشي صدفة ان منتجي الفيلم الفضيحة "المسيرة الخضراء" عثمان بنزاكور ومهدي بلحاج دارو عرض اولي ليه البارح لخميس ف"ايماكس" بموروكو مول فكازا. طبعا ما فراسهمش اش واقع ولكن اللي وراهم واللي دفعوهم يديرو هاد الشوهة فراسهم. بان كي مون الامين العام الاممي قدم تقريرو حول الصحراء الى مجلس الامن والقضية تمر بمراحل حرجة راه خرج ليها "كود" الملك محمد السادس فالرياض في خطابه بالقمة المغربية الخليجية. هاد الفيلم اللي تعلم فيه السينما وبزاف عليه مخرج كان مزيان فالتمثيل وهو يوسف بريطل تعطاتو كلشي الامكانيات باش يكون فيلم مقاد. تحفة حتى واحد فهاد لبلاد ما كان معول عليها. كنا باغيين غير فيلم مقاد وصافي بحال افلام محمد اسماعيل وحسن بنجلون ماشي حتى افلام فوزي بنسعيدي ولا حكيم بلعباس. دابا خرج فهاد الوقت باش تكون عندو وظيفة ودور سياسي. البروباكاندا ارتبطات بالسينما ماشي عيب. شوفو التجربتين السوفياتية ثم الروسية والامريكية اش عطات. تحف سينمائية ولكن فاصلها بروباكاندا. هاد الفيلم ما فيه حتى حاجة من هاد الشي.
نبداو بتصويرو اللي خسرو فيه فلوس بزاف وميزانيتو ما عرفناش كيف دارو ليها وصلات ل5 ملايير سنتيم كاغلى فيلم في تاريخ السينما المغربية.
المخرج كيكول كلام كبر منو. السيد اللي ما عارف والو على الصحرا والقضية وتفاصيلها وتشعباتها كال "أفلام مثل هذه تعرف الجيل الجديد بتاريخه وتعزز انتماءه إلى الوطن" و"خاصنا أفلام بحال هادو" ولانه ما عندو علاقة بالسينما بالاخراج بالابداع كان عادي يحل فمو ويقارن هاد الفيلم ب"اخر ساموراي". فيلم ادوار زويك واللي لعب فالبطولة ديالو طوم كروز وتيموتي بسال وايرويوكي سانادا واللي خرج ف2003. نخليكم انتوما تحكمو. بريطل كال كلام يستحيل يرد عليه شي عاقل.
هاد الفيلم اللي كلشي كلا فيه طرف الخبز يعني كلشي ساهم فهاد الفضيحة من ممثلين وتقنيين وكانو فرحانين بالتصوير وكيكولو لينا فيلم واحد وطلعو كذابة ومنافقين وما فيدهمش.
دابا حشومة على اللي فكر فهاد الفضيحة. السينما تحتاج لابداع اعباد الله ماشي الامكانيات ماشي لفلوس. خاصها عقل مبدع بحالها بحال جميع انواع الابداع. هاد العقل باش يبدع نحتاجو من بعد للامكانيات. هاد الفيلم خرج من الخيمة مايل. هاد الشي علاش طلع زيرو.
بهاد الفيلم هاد المخرج وللي معاه ساؤوا للصحرا وكون كان شجاع يديه يدير ليه عرض اولي فمدينة لعيون، عارف حتى الوحديين فالصحرا ما غادينش يحملوه. حقاش ماشي فيلم.
كاين واحد السينمائي مجهد اسمه خابير فارديم. اسباني من لاس بالماس دا الاوسكار ف"ناو كونتري فور اولد مان" للاخوين كوين. هادا متعاطف مع البوليساريو. دار فيلم بامكانيات قليلة بزاف على فيلم بريطل وعرضو فامريكا كلها. ماشي حقاش من هوليود وهادي كتلعب شوية٬ ولكن حقاش مس شي حاجة عن ميريكان. فيه ريحة الابداع.
بحالك يا ولدي با ريطل وهادوك اللي وراك سواء فصنعة بلادي ولا ماشي صنعة بلادي وهادوك المنتجين احسن حاجة ديروها للصحرا هي تبعدو منها. خليو الاساتذة يتقدمو. طرفاية لداوود اولاد السيد عن الصحراء اكثر عمقا. يا عباد الله شوفو الفيلم الاخير ديال عبد الرحمان سيساكو "تومبوكتو" وتعلمو. عميق قوي شاعري ورخيص. المبدع مبدع. علاش نداء الحسن والدرابو راه السينما هادي. فين الابداع. بريطل دار جريمة سينمائية ففيلمو الاول على الشعبية كلنا ما كاين باس يتعلم وتعطيوه الصحراء. وا شفتو ها علاش كنعيشو وضعية حرجة مرة مرة فالصحراء حقاش بحال بريطل والمنتجين معاه كاينين حتى فالسياسة