تحية بوغطاطية للجميع، بوغطاط المغربي يحييكم من جديد. وهانا جيت نكمل ليكم الجزء الثاني من واحد الشويكيك ديال "الحقائق المزعجة" على علي لمرابط وكيفاش كان كيتعامل مع المخزن بمنطق: "المخزن حرام ولكن فلوسو حلال". ولكن قبل ما ندخل فصلب الموضوع، أدعوكم قراءنا الأعزاء لقراءة الجزء الأول لي غتلقاو الرابط ديالو هنا لتحت، باش تفهمو أكثر هاد الجزء الثاني. بوغطاط المغربي يكشف علاقة علي لمرابط بالقصر الملكي وكيفاش كان كياخذ من عندهم فلوس صحيحة؟ شكون هادا لي ما كيبغيش لفلوس؟؟ جملة لي قالها علي لمرابط فواحد الفيديو ديالو بتاريخ 26 أبريل 2022 وهو كيحاول يبرر الابتزاز ديال زكرياء مومني للمغرب. صراحة ما استغربتش نهائيا من العبارة، خصوصا من مور المقال لي كشفت فيه كيفاش كان لمرابط كياخذ فلوس صحيحة من عند مستثمرين ورجال أعمال محسوبين على القصر الملكي لي كيقول عليه أنه كيعاديه وبلي ساخط عليه، وبلي هو لي منعو من الكتابة. ولكن كيف تيقولو لمغاربة: "لي مبلي بالسعاية يقصد الديور لكبار". إيوا أسيادنا اليوم غادي نزيد نكشف ليكم كيفاش عاوتاني لمرابط مالقاش ما حسن من "الدار الكبيرة" أو "دار المخزن"، باش يسعاها وبفضلها، كلا طريف د الخبز شي يامات. و إمتا الله يخليكم؟؟ فنفس الوقت لي كانت المدة ديال المنع ديالو من الكتابة قربات تسالي. كيفاش؟؟ تا أش كاتقول أبوغطاط؟؟ لمرابط لي كان منوض لقيامة كيتاهم القصر بلي هو لي منعو من الكتابة وبلي هو لي سد ليه الجرائد ديالو وبلي مضطهدو ومنعرف شنو، ورجعها معركة حياتو ضد ما يسميه "المخزن"، غادي يمشي عند نفس الجهة يخدم معاهم وياخذ من عندهم لفلوس من الفوق؟؟؟ لااا ما يمكنش !!! تا كيفاش ما يمكنش؟؟ ياك عاد قلنا مكاينش لي مكيبغيش لفلوس؟ واااا هو بصراحة بصراااحة... لفلوس كاتغير النفوس. هااااااا.... عاودها عاودها. لفلوس أسيدي كاااتغير النفوس ولكن ماشي لهاد الدرجة تاني، هادي صعيبة شوية. ماشي لهاد الدرجة؟ تا كون تعرف لأي درجة يضرك خااااطرك. كيفاش؟؟ لفلوس فعلا كتغير النفوس، ولكن فاش كتكون معروضة عليك وباغيين يشريوك ماشي تكون نتا لي مدفڭ عليهم وغادي عندهم برجليك تسعاهم. هادي هي المصيبة بعينها. أنك تكون كتحاضر فالشرف ونتا... كمل من عندك. لا لا لا مايكمكنش، ماشي ديال لمرابط هادي. ماشي ديال لمرابط؟؟ راك باااقي مكتعرفوش. سمعني أولدي الله يرضي عليك، باراكا ما تبدا كل شوية تصدم عليا هنايا وتبع معايا دقة دقة باش ما تبقاش غير متيق مدرم ونتا مخدوع. وباش تفهم حقائق مهمة بزاف. الحقائق لي أكيد غتكون مزعجة ولكن مزعجة لهادوك لي ولفو يكذبو... وعلى رأسهم علي لمرابط براسو. نهار 10 أبريل 2015، علي لمرابط كان ضيف ديال جمعية "الحرية الآن" ديال المعطي منجب، لي دار ليه احتفال خاص بمناسبة نهاية مدة المنع ديالو. وفهاد النهار منجب قال فتصريح ل CNN أن لمرابط تمنع من مورد رزقه. وكان كيحساب ليه بلي مغاديش يتعرف منبعد بأن مورد رزق لمرابط فداك الوقت كان هو ناس المخزن نفسهم لي كيتاهمهم بلي هما لي منعوه. المعطي منجب كان déjà ضمن فريق ديال واحد المجلة مغربية متخصصة فالتاريخ، كمستشار علمي إلى جانب مستشارين خرين. وهاد المجلة غادي يتصاب منبعد أن علي لمرابط كان كيكتب فيها مقالات باش يترزق وياكل طرف د الخبز، خصوصا وأن القضية عندو كانت محزوقة لدرجة ما خلا حتى شي مدير نشر أو تحرير إلا ومشا عندو يسعاه ويرغبو ويزاوڭو باش يخليه يكتب بإسم مستعار ويترزق الله. وحسب معطيات حصرية قدرت نحصل عليها، كانو صراحة كيشفقو عليه بزاف. إيوا فين المشكل أنه يكتب مقالات فمجلة تاريخية مقابل لفلوس؟ هادي مسألة طبيعية. ولمرابط براسو كان déjà قالها شحال هادي لواحد من المقربين منو بزاف. كان قال ليه: "أنا كنتخلص على الكلمة والحرف. حتى حاجة ما فابور. وما حدي كنخدم خاصني نتخلص. نهار ما نخدمش ما نتخلصش". المشكل هو ماشي أنك تكتب بمقابل مادي أو تحت الطلب أو تكون نتا أصلا لي طالب راغب وساعي باش تكتب مقابل لفلوس. وماشي كذلك مشكل أنك تكتب ف دومين آخر مختلف تماما على لي كنتي كتكتب فيه. وإنما المشكل تكون كتشطح وكتحاول تخبي لحيتك. وهادشي لي كان كيديرو لمرابط فاش كان كيكتب مقالات باسم مستعار فديك المجلة... تقول "حراڭ" ماشي صحافي. كاين لي غيقولي: وا بسيف يكتب بإسم مستعار حيت أصلا كان ممنوع من الكتابة. ولكن راه حتى فاش سالا المنع كان مازال كيكتب بإسم مستعار وماشي غير فديك المجلة بوحدها. علاش زعما؟ واش حيت كان مولف يكتب غير فالسياسة وما بغاش يبين سميتو فتخصصات خرين باش مايقولوش عليه مات ليك الحوت أو بعتي الماتش؟ ولا حيت المقالات لي كتبها أصلا ما مقتنعش بها؟ الحقيقة، لا هادي ولا هادي... المشكل ببساطة كان فالمجلة فحد ذاتها. وهي مجلة "زمان" لي مولاها هو رجل الأعمال الملياردير مولاي حفيظ العلمي لي بدا مسيرتو فالبيزنيس فالمغرب فقلب "الهولدينغ" الملكي السابق ONA، ككاتب عام قبل مايولي المدير العام المكلف بالتأمينات فهاد الهولدينغ... وطبعا منبعد غايدير البزنيس ديالو الخاص فمجال التأمينات، واستثمر كذلك فالإعلام، ماشي غير فمجلة "زمان" وإنما فصحف ومواقع الكترونية عديدة... بعبارة أخرى كنهضرو على واحد من ولاد دار المخزن ورجال الأعمال النافذين فالبلاد، لي لمرابط ما لقا حتى شي حرج باش يأمن حياتو ويتخلص من فلوس العلمي وبالتخبية من الفوق.... ومنين كانو كيتعطلو عليه فالخلاص كان كيهددهم بلي غادي يرفع عليهم دعوى... وا لايني لصقاااا هاد لمرابط هادا ومكيتفاااكش مع الڭرمومة. ولكن من الأمور لي جابتلي الضحك، هي أن مجلة "زمان" لي شراها مولاي حفيظ العلمي ف 2012 وكان كيكتب فيها لمرابط بإسم مستعار، الفريق ديال المستشارين العلميين ديالها كانو فيه 3 د الناس: مصطفى بوعزيز، المعطي منجب... زيد وشكون آخر؟؟ حسن أوريد ههههه أاايييه أسيادنا. حسن أوريد الناطق الرسمي بإسم القصر سابقا، ولي ماشي بعيد بصفته مستشار علمي للمجلة، يكون كان كيصحح المقالات ديال علي لمرابط المكتوبة بإسم مستعار هههههه. حسن أوريد لي عاود عليه لمرابط فنفس الفيديو لي كان بتاريخ 26 أبريل 2022 واحد لخرافة عجيبة وغريبة. وادعى بأن أوريد فاش كان خدام فالقصر، مكانش كيحمل لمرابط يامات Le Journal حيت مكيكتبش "صاحب الجلالة" فالمقالات ديالو وبلي قال لبوبكر الجامعي فشي لقاء معاه بحضور مستشار الملك أندريه أزولاي، راه داك علي لمرابط غسلت عليه يدي. والحقيقة أن هاد الواقعة معروفة وتعاودات فمصادر مختلفة ولكن ماشي بالشكل لي عاودها لمرابط. حيت بكل بساطة لمرابط ما تجبدش نهاااائيا فاللقاء لي كان بين الجامعي وأوريد وأزولاي. عمر بروكسي سبق عاود هاد الواقعة فواحد الكتاب ديالو بناءً على الشهادة ديال بوبكر الجامعي وماكانش فيها هادشي لي قال لمرابط. علي عمار كذلك، لي أصلا كان مشا مع بوبكر الجامعي هو وفاضل العراقي لداك اللقاء وساينوه على برا، حتى هو عاود على هاد الواقعة فواحد لكتاب ديالو ف 2009. ولكن لخرافة ديال لمرابط على أوريد ما مذكوراش فيه نهاااائيا. بوبكر الجامعي براااسو لي معني بهادشي ولي تقالت ليه ديك الهضرة، حتى فاش عاودها للعموم، لا فالندوات ولا فالاستجوابات الصحفية، ماااا عمرو جبد ديك الخرافة لي هضر عليها لمرابط بخصوص أوريد. بل كثر من هادشي، بوبكر الجامعي عاود الواقعة بالتفصيل (صوت وصورة) فواحد الندوة فبروكسيل حضرها علي لمرابط نيت، وفاضل العراقي، وحتى عمر بوركسي، ولكن ما جبدش هاد لخرافة نهاااائيا. وها نتوما الفيديو لتحت تأكدو بعينيكوم ووذيناتكم. وا إذا كان بوبكر الجامعي ما عمرو هضر على هادشي، ولا علي عمار، ولا فاضل العراقي، ولا عمر بوركسي... حتى حد فيهم ما هضر شي نهار على هادشي لي قال لمرابط على أوريد. إذن منين جايب هاد لكلام تاني؟؟ إذن من هنا نستنتج أن لمرابط كذاااب كبييير وكينفخ فراسو بلا قياس باش يبان واعر وبطل كيما ديما، باش يصفي حساباتو الشخصية مع الدولة. بحال لي ولينا شايفينو هاد ليامات كيدوز فالقنوات الإسبانية يوزع فالاتهامات ضد بلادو ووصلات بيه الوقاحة يطلب ويرغب يقلبو التلفون ديالو ويقارنوه مع ديال بيدرو سانشيز باش زعما يثبتو بلي المغرب بصح تجسس ببرنامج بيغاسوس. واش شفتو شي وقاحة ووساخة وتاشكامت كثر من هادي؟؟ أن الصبليون براسهم نفاو يكون المغرب استعمل بيغاسوس باش يتجسس عليهم، ولمرابط باااقي حالف بلي المغرب خدم بيغاسوس. قمة التفرويح وطيران لفريخ لي وصل ليها لمرابط و ولا بوحدو كيتخايل أمور مكايناش فالواقع. (وهادشي طبعا كنت سبقت هضرت عليه فالمقال السابق). وهي نفس الهلاوس لي بقا كيعاودها لمرابط على حميد الشنوري (لي تقلد مناصب كثيرة فوزارة الداخلية وحاليا عامل ديال خريبكة) بحيث اتاهمو بدون أي دليل بأنه كان باغي يطيحو فشي فخ يامات كان والي أمن تطوان، وقالك حڭا والواد كان مدبر ليه شي شكاية كيدية يتاهموه فيها بلي سرق شي باب فيها شي 2 أو 3 طن (وااا ربط السلوڭية أبا علي) وبلي شي بوليسي جا حذرو ف جوج أو ثلاثة د الصباح. وقالك أسيدي مادام الشنوري كان كيطبخ ليه شي ضوسي باش يغرقو ومادام نفس الشنوري هو لي بان معا زكرياء مومني فواحد التسريب لي فضح الابتزاز ديالو للمغرب. فإذن داكشي لي كيقولو المومني راه صحيح. الحاصول واحد "الحريرة" وواحدة خالوطة جالوطة لي مكانتش مبنية على أي دليل ولا منطق أصلا. داكشي علاش مالقيتش شي حاجة خرى تعبر على ديك لخرافة من غير هاد الكاريكاتور: المهم... نرجعو لموضوعنا، ودائما تحت شعار "المخزن حرام ولكن فلوسو حلال" و"ناس المخزن خايبين ولكن فلوسهم زوينين"، علي لمرابط مكانش كيترزق فقط من مجلة "زمان" ديال مولاي حفيظ العلمي لي كان كيكتب فيها بإسم مستعار، وإنما غادي يطلب ويرغب باش يكتب فمجلة خرى سميتها "دين ودنيا" لي أسسها سليمان بنشيخ فدجنبر 2015، و لي كان فنفس الوقت هو رئيس تحرير مجلة "زمان". ولكن شكون فنظركم مول الشكارة ديال هاد المجلة؟ وشكون كان المساهم الرئيسي فيها؟؟ إنه إلياس العماري يا سادة. أاايييه. إلياس العماري (من نفس الأصول ديال لمرابط) لي كان فداك الوقت نائب الأمين العام ديال حزب الأصالة والمعاصرة لي أسسو فؤاد عالي الهمة قبل مايولي مستشار الملك. إلياس العماري كولشي عارف طبيعة العلاقات وتشعباتها لي كانت عندو مع دوائر صنع القرار. وماشي هادشي فقط وإنما ب 10 أيام فقط من مور إطلاق مجلة "دين ودنيا" لي كان المساهم الرئيسي فيها، العماري غادي يعلن إنطلاق المجموعة الإعلامية ديالو "آخر ساعة"، مع عدد من المستثمرين ورجال الأعمال، لي كان من بينهم كريم بناني واحد من كبار المستثمرين فمجال "الإشهار" ومقرب من واحد من المستشارين ديال الملك. وتحت شعار "ضربت لصقت"، علي لمرابط كان مزروب على الصّريف وبدا يكتب فمجلة "دين ودنيا" من أول عدد ليها. ونشر أول مقال فيها بعنوان: "Les oubliés d'Allah". بعد أقل من عام على إطلاق المجلة، كانت الهضرة دايرة بلي غادي يضموها لمجموعة إلياس العماري "آخر ساعة"، ولكن من مور ما خرج العماري من المجموعة الإعلامية ديالو بعدما نتاخبوه أمين عام ديال "البام"، كريم بناني هو لي غيشد المجموعة وتعاودات الضمسة ديالها، بحيث فرقو بين الشركة ديال الطباعة والنشر وبين الشركة المسيرة للصحف ديال المجموعة، وغادي يتم الاتفاق مع سليمان بنشيخ يكون هو المدير العام ديالها، ولكن بلا مايسمح فرئاسة التحرير وإدارة النشر ديال المجلة ديالو "دين ودنيا" لي كان كيكتب فيها علي لمرابط. غير وكان كريم بناني المقرب من المحيط الملكي غيولي المساهم الرئيسي فمجلة "دين ودنيا" لي كان كيكتب فيها علي لمرابط. ومن هادشي كااامل لي عاودتو ليكم، غادي تلاحظو بأن النقطة المشتركة بين هاد جوج تجارب لي عاشهم علي لمرابط (مجلة "زمان" ديال مولاي حفيظ العلمي ومجلة "دين ودنيا" ديال إلياس العماري وكريم بناني) هو أن لمرابط ما عمرو هضر عليهم، ولا بارطاجا شي مقال من المقالات لي كان كيكتبها فيهم، ولا حتى دار شي إشارة خفيفة من تلقاء نفسه من باب استرجاع الذكريات بحال لي كيدير مع بعض المقالات لقديمة ديالو ف Demain أو لوجورنال أو بعض المواقع الإسبانية والجزائرية وغيرها من المواقع.... لا وااالو وتقول... و إذا دل هذا على شيء، إنما يدل على أن علي لمرابط ماشي غير فكرشو لعجينة وصافي وإنما هو العجينة براااسها... en personne ومكاين لا استقلالية ولا مهنية ولا حتى حمصة ماشي غير ستا حمص... وماغاديش نقول ليك فيق من الڭلبة، حيت بااااقي أشواط خرين وحقائق مزعجة كثيييرة لن تخطر على بال أحد بالحجج والبراهين بخصوص ما أعرفه عن علي لمرابط والزريبة ديال النصابة والفاشلين لي ولا مدور بيها راسو مؤخرا... وكايعمر عليهم فالشوارج، لي كان موالف يعمرهم من شحااال هادي فاش كانو هما مازاااال كيرضعو حليب لبقيرات ديال عمو فؤاد عبد المومني... تحياتي !
