بعدما وقفات التلفزة ديال فيصل لعرايشي حسكة في وجه شفيق السحيمي مول "العين والمطفية" و"وجع التراب" ورفضات المسلسل الجديد تاعو "شوك السدرة" ناض السي السحيمي وخلع مالين التلفزة وعلى راسهم لعرايشي، ماشي قرر يفضح الخواض للي نايض بين شي منتجين فالتلفزة، أو هددهم بأنه غادي يعري على الطرافيك للي كايحصل بين المخرجين وصحاب الشكارة. فالسيد مع قاري برا، وشعبان ثقافة تاع شهب الراس، هددهم بالاحتجاج وصافي قال غادي نضربها كعطلة من كازا للمحمدية، ومن تما نمشي على رجليا حتال بوزنيقة وهانا غادي كانحتج ونتفجج حتا نوصل لدار البريهي فالرباط، وتما نكمل الباهية، هاذ الاحتجاج السلمي وخا ماصدقش، نوض القفقافة فالسي لعرايشي، الأمر للي خلاه يجلس فالطابلة مع مول "وجع التراب" ويطرقو المسمار. الهم، جاب الله التيسير ماشي غير مع السحيمي وصافي، بل مع مجموعة من القنانة للي طلعات ليهم فالميا غايكون لعرايشي قال مع راسو :"الباب للي كايجيك منو الصهد قفلو وتبرد.. السيد دار الوجع فالتراب فما بالك في آنا؟!"، لذلك، استجاب للطلبات تاع الفنانة، ومريضو هو ما عندو باس.
