بعد الماتش البارح بين المغرب والمانيا فاول ماتشات المجموعة الثامنة بالملعب المستطيل بميبلورن عن كأس العالم باستراليا ونيوزلندا٬ كانو اللعابات منهارات. خارجات شي الدموع فعينيه وشي تقريبا منهار. قليل اللي قبلو من اللعابات يهدرو مع الصحافة المغربية ف"زون ميكس". روزيلا ولحماري من هادوك لقلال اللي عطاو تصريح. فهاد الحوار كتجاوب اللعابة لحماري على اسئلة على الماتش وعلى بعد الماتش. بعد دقايق باش سالى هاد الماتش. اش كيبان ليك؟ لخسارة ثقيلة وصعيبة. ان شاء الله نفرحو الشعب المغربي ومازال عندنا جوج ماتشات باش نقلبو على التأهل حقاش جينا نكونو منافسات قويات. اللعابات كلهم مفتاخرات باش نمثلو المغرب فاول مشاركة ليه فالمونديال وحزينات لانو ما قدرناش نديرو ماتش مزيان لينا. هاد الماتش ورانا. دابا باقي لينا جوج ماتشات كي داير المورال فالفيستيار ؟ القضية صعيبة. باش تخسر ماتش بنتيجة ثقيلة. خاصنا نتحركو دبا. هاديك راها لالمان اللي خسرنا معاها. هاداك راه ماتش سالى. خاصنا نوضو ونوجدو للماتشات اللي بقاو باش نمشيو نربحو كوريا. اش من صعوبات لقيتوها فماتش اليوم؟ اللي كان فارق هو التجربة ديال لالمان. التفاصيل اللي خلاتهم يماركيو. لبيلاسمون ديالهم بين الخطوط. السرعة فتحركاتهم. كيعرفو بعضياتهم مزيان. عندهم نيفو طالع بزاف. ما ننساوش راهم هما الثانيين فالمونديال وكنظن النتيجة ما كتعكسش الماتش. وحنا غاديين نبينو باللي ما جيناش على والو لهاد المونديال. دابا خاصنا نوضو بالزربة ونرجعو نخدمو ونوجدو لماتش كوريا
