كعيش المنتخب الوطني المغربي للسيدات جو زوين قبل من الماتش الحاسم ضد كولومبيا برسم الجولة الثالثة والأخيرة فدور مجموعات كأس العالم للعيالات 2023، بأستراليا ونيوزيلندا، والمورال طالع عند اللاعبات المغربيات اللي باغيين يفرحو المغاربة بتأهل تاريخي إلى ثمن النهائي. وخلال الحصة التدريبية ديال المنتخب المغربي اليوم الثلاثاء، قالت اللاعبة فاطمة تكناوت فتصريح للموقع الرسمي للجامعة الملكية المغربية لكرة القدم: "الاستعدادات غادية مزيانة للماتش الثالث ضد كولومبيا الخميس الجاي، كنتمناو نتوفقو فيه ونذوزو للدور الثاني، وهذا الشي اللي كنتمناو باش نفرحو الشعب المغربي كامل، وديما مغرب". صوفيا بوفتيني حتى هي عبرت على الشعور اللي كيتقاسموه اللاعبات المغربيات قبل المواجهة المصيرية ضد كولومبيا، وقالت: "حنا فرحانين بزاف بالماتش الأخير اللي درنا ضد كوريا الجنوبية، حيث فرحنا بزاف ديال المغاربة وغنديرو ما فجهدنا الماتش الجاي اكثر باش نربحو جميع المغاربة، وديما مغرب".