ربحو لاعبات اسبانيا نقطة جديدة ومهمة ضد رئيس الاتحاد الاسباني الموقوف لويس روبياليس، المتهم فقضية تحرش جنسي خلال واقعة فينال كاس العالم للسيدات، فين استغل تتويج منتخب سيدات لاروخا وبدا يبوس فاللاعبات ويعنق فيهم، لدرجة انه باس اللاعبة جيني هيرموسو فالفم ديالها. وبعد ايام على توقيف لويس روبياليس من طرف الاتحاد الدولي لكرة القدم على المهام ديالو وتقديم الحكومة الاسبانية شكاية للمحكمة الرياضية الدولية الطاس باش يحيدوه من المنصب، وفتح النيابة العامة الاسبانية تحقيق فقضية تحرش متهم بها روبياليس فحق لاعبات اسبانيا، خرج رسميا الاتحاد الاسباني باش يعتذر من اللاعبات والمجتمع الاسباني والمجتمع الدولي على الفعلة ديال روبياليس. الاتحاد الاسباني اللي كيترأسو دابا بيدرو روشا بعد توقيف الفيفا للويس روبياليس، خرج ببيان تبرا من الاخير واكد فيه انه كان غالط فالسلوك اللي دار تجاه لاعبات المنتخب الاسباني، وطلب المسامحة من الجمهور الاسباني والجماهير فمختلف انحاء العالم والمؤسسات الرياضية الدولية واكد ان داكشي اللي دار لويس روبياليس يتنفى مع قيم المجتمع الاسباني. وشدد الاتحاد الاسباني لكرة القدم انه رهن اشارة الاتحاد الدولي للعبة والمحكمة الرياضية الدولية، مستعد يقدم أي مساعدة من وثائق او غيرهما باش يعاون فالتحقيق فالقضية اللي ولا قضية رأي عام دولي.