سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
اللحايا للي ناشطين دابا حيت لقيتو همزة "أد سنسية" جديدة فنقاش المدونة علاش مركزين على إسلامية الدولة وما تاتهدروش على أن تسعود وتسعين فالمية من الشريعة الإسلامية ما مطبقش فالبلاد؟
علاش تانتزوجو؟ باش نولدو؟ باش نشبعو جنسيا؟ باش نتعاونو على الزمان؟ باش نرضيو العائلة والمجتمع؟ ما تايهمش علاش، كلنا عندنا الحق نتزوجو يلا بغينا، ويلا فشل المشروع خاص الدولة تدير لينا إطار قانوني للي يحمينا ويحمي ولادنا يلا كانو. ما تانضنش أن هادشي للي قلت غا يختالف معاه شي واحد، لا مرأة لا راجل. لكن الهدرة حاجة والواقع حاجة أخرى. من جهة كلشي باغي المساواة ومن جهة أخرى كل واحد تاينش على كبالتو. لمرا باغة المساواة فالورث وما باغاهاش فالحضانة وفالمتعة والنفقة، والعكس بالنسبة للراجل. فين كاين مصدر الخلل؟ علاش ما يمكنش نديرو مدونة منصفة مئة بالمئة؟ علاش غا يكون ديما شد ليا نقطع ليك وحروبات حروبات؟ الجواب ساهل: خلط الديني بالوضعي. ما يمكنش تجبد حوايج من القرن السابع وتخدم بيهم فالقرن الواحد والعشرين. يا إما نديرو مدونة إسلامية بكلشي ديالها، يا إما نديروها وضعية ما فيهاش ريحة الدين. أو ممكن نديروهم بجوج، للي بغا قال الله قال الرسول يديرها، للي بغا قال القانون يديرها. المغرب ما فيهش غير المسلمين، بزاف ديال المغاربة تحولو لأديان أخرى وبزاف ولاو لادينيين. واش ما من حقهومش هاد الناس يتزوجو زواج مدني ما فيهش ريحة العطرية الإسلامية؟ واش المسلم فالدول المسيحية مفروضة عليه مدونة مسيحية؟ اللحايا للي ناشطين دابا حيت لقيتو همزة "أد سنسية" جديدة فنقاش المدونة، علاش مركزين على إسلامية الدولة وما تاتهدروش على أن تسعود وتسعين فالمية من الشريعة الإسلامية ما مطبقش فالبلاد؟ علاش الشيخات ومسائل الجنس والزواج والطلاق والحيض والنفاس هي للي تاتحرك فيكم النفس والغيرة؟ بغيتونا نرجعو للقرن السابع؟ نرجعو لزواج المتعة للي محتاجينو اليوم أكثر من الوقت للي كان فيه حلال؟ نرجعو لزواج الأطفال؟ نرجعو لملك اليمين وأمهات الأولاد؟ نرجعو للزواج بلا عقد؟ الحركات النسوية للي تاتشيطنو الراجل شنو بغيتو بالضبط؟ أن للي طاح من كاميو الدين تاخدوه واخا فيه ظلم للراجل؟ أنكم تزيدو تكرهو الراجل فالزواج؟ أنكم تزيدو تشجعو النساء على الطلاق؟ الحركات الذكورية للي تاتشيطن المرأة، بغيتو نرجعو كلشي فيد الراجل؟ بغيتو كل حاجة فالدين مستافد منها الراجل تاخدوها، وفنفس الوقت ما بغيتوش المتعة والنفقة؟ بغيتو المرأة تكون عبدة جنس؟ حمار الطاحونة، حادرة عينيها وتاتصرع الملاوي؟ دوك للي خدامين على المدونة الجديدة، راه ما سميتهاش مدونة المرأة، سميتها مدونة الأسرة، الأسرة فيها مراة وراجل وأطفال. الزواج ما خاصوش يكون تقميرة تاتديرها ونتا خايف تخسر، ونتا خايف من عامرة فخاوية، خايف من شريك حياتك، صابر على الذل والهوان حيت يلا هدرتي ترعف. الزواج ثمرة نية حسنة عند جوج ديال الناس أنهم يتشاركو سنوات طويلة من عمرهم. الدولة خصها تعتابرهم جوج أشخاص، ماشي راجل ومراة. يعني عندهم بجوج نفس الحقوق والواجبات. هادي هي المساواة الحقيقية!
