ربحو بايرن ميونيخ الألماني اللي كيلعب معهم المغربي نصير مزراوي خصمهم كلطة سراي التركي اللي كيلعب معهم المغربي الاخر حكيم زياش، اليوم الاربعاء ضمن منافسات شومبيونزليك. وسالا الماتش بين بايرن ميونيخ وكلطة سراي بنتيجة 2 لواحد لمصلحة الفريق الألماني، وماركا لهم الهدفين فالماتش الهداف النكليزي هاري كين فالدقيقة 80 و86، أما الأتراك ماركا لهم هدفهم الوحيد سيديرك ماكامبو، وتأهلوا البايرن عن المجموعة 1 إلى دور 16، قبل نهاية لكروبات برصيد 12 نقطة وصعبات عند القضية عند كلطة سراي. الماتش بين بايرن ميونيخ وكلطة سراي، عرف مشاركة نصير مزراوي رسمي مع الألمانيين ولعب الماتش كامل، ولعب حكيم زياش مع الأتراك رسمي وخرج فالدقيقة 58. وفماتش آخر، ساهم المغربي إبراهيم دياز الرباح ديال ريال مدريد الإسباني على سبورتينك براك البرتغالي، وافتتح التسجيل للفريق الملكي بهدف فالدقيقة 27، وسهل عليه الفوز بنتيجة 3 لزيرو، وزاد فينيسيوس الهدف الثاني ورودريكو الهدف الثالث، وضمنو ريال مدريد التأهل عن المجموعة 3 إلى دور 16 برصيد 12 نقطة. أما السبع المغربي سفيان أمرابط بقى كيتسنا الدقيقة 46 من عمر ماتش الفريق ديالو مانشستير يونايتد النكليزي ضد كوبنهاكن الدنماركي، باش يلعب ودخل لقى الفريق ديالو متعادل بنتيجة 2 لجوج، قدرو يماركيو بعدها الهدف الثالث، مي ما قدروش يحافظو على الرباح وتقلبو عليهم الدنماركيين اللي ضربو جوج أهداف وربحو بنتيجة 4 مقابل 3. البرج المغربي يوسف النصيري فمكانش محظوظ اليوم مع فريق إشبيلية الإسباني، وخسرو ضد أرسنال النكليزي، بنتيجة 2 لزيرو، وراه لعب رسمي 90 دقيقة كاملة.
