ما بغاش يقول التونسي فوزي البنزرتي مدرب الوداد الرياضي واش غيمشي من الفريق الأحمر أو أنه غيكمل فالخدمة ديالو، وهذا الشي بعد الخسارة الجديدة ديال الواك البارح الثلاثاء، ضمن مؤجل الدورة 21 من البطولة الاحترافية لكرة القدم. وبعدما سالا الماتش الوداد الرياضي واتحاد طنجة بخسارة الواك بنتيجة 2 لزيرو، حاولو الصحافيين فالندوة اللي من ورا المباراة بإلحاح يسولو فوزي البنزرتي على المستقبل ديالو مع الوداد، خصوصا وأنه مدرب ألقاب وعمرو عاش شي وضع بحال اللي كيعيش دابا ديال سوء النتائج، وما بغاش يجاوب واش غيستسلم ويمشي من الواك أو أنه غيكمل. وكيواصل الوداد الرياضي حصد النتائج السلبية، بخسارة فالميدان مع اتحاد طنجة اللي كيلعبو على البقاء وخسرو الواك معهم بنتيجة 2 لزيرو فالبطولة وخرج الفريق من لاكورس على اللقب.