أكد رضوان الفالحي المدرب المؤقت للوداد الرياضي أن الفريق لعب مزيان ضد شباب السوالم ودار كلشي واخا خسر وتقصا من سدس عشر نهائي كأس العرش، واعترف بلي الواك كيدوز من مرحلة صعيبة. وهضر التونسي الفالحي بعد خسارة الوداد مع السوالم بواحد لزيرو، وقال: "تحكمنا فالماتش كامل وللأسف خسرنا، وجاتنا 15 فرصة ما قدرناش نماركيو منهم حتى وحدة، والسوالم جاتهم فرصة واحدة ماركاوها، وحنا والسطاف تيكنيك حذرنا من خلال الفيزيوناج وجودة اللاعبين اللي عندنا باش نكونو حاضرين فالماتش وللأسف ما مركيناش وضيعنا فرص بهاد الطريقة وآخر جوج فرص كان المرمى خاوي والگول كان خارج وللأسف خسرنا الماتش". وبخصوص علاش اعتمد على لاعبين ما عندهمش التنافسية، جاوب رضوان الفالحي وقال: "العملود مصاب، وفالكولوار اليمين لعبنا بإسماعيل الغزاوي ودرنا فيه الثقة ودار ماتش محترم وجات كثر من فرصة من الجهة ديالو، وبالنسبة لبنيشو والخنوس حتى هما نفس الشي عندنا إصابات كثيرة فالگروب، واليوم كانوا عندنا 19 لاعب فلاليست، وكنا ناقصين وتعاملنا مع الموجود وما كنبغيش ندوي على الغيابات حيث اللاعب اللي موجود راه كافي وكيدير الدور ديالو، باركا أنه كيلعب فالوداد فخاصو يعطي أحسن ما عندو، والوضعية ديالنا صعيبة وتحملنا المسؤولية واللي جاي احسن بفضل الاستراتيجية ديال الفريق والتحضير للموسم الجاي".
