معرض لفلاحة بمكناس اللي كيتسمى « الملتقى الدولي للفلاحة بمكناس » او « سيام » كان اعدادو وتهييئو معطل. كان هادي 3 اشهر كلشي معطل. كان خوف وزارة الفلاحة ومعاها المندوب الجديد للمعرض كبير. حسب ما علمته « كود » الشكوك بدات تدخل لعدد من الاطراف المساهمة فالتنظيم. لكن لمغاربة عندهم مع الفينيش. عندهم مع يجي عندك ضيف وفساعتها توجد ليه كلشي ويتعشى. هاد الجانب « الاعتباطي » كنخدمو بيه فمجالات مختلفة. فتنظيم « السيام » فنسختو 16 كان شوية من هاد الشي. لكن فظرف قياسي العاقبة خرجات على خير. النتيجة ماشي غير نقدو الدورة ولكن اللي كيشعر بيه اللي حضر لدورات سابقة وحضر هاد العام باللي كاين تقدم. كاينة خدمة مزيانة داروها المتدخلين. يمكن باش طار الشامي جواد وجا كمال هدان فمنصب المندوب العام للملتقى بالنيابة. هاد المسؤول اللي هو المدير الجهوي للفلاحة بجهة فاسمكناس٬ قلات التوترات. ما بقاش شد لي نقطع ليه. ولى تناغم كبير بين وزير الفلاحة الصديقي وبين هاد المندوب. واخا فالحقيقة الخدمة ديال 3 اشهر الاخيرة دارها الصديقي وفرقتو. النتيجة كيف قلنا قبل بانت. اروقة مقادة. اقبال كبير من قبل المواطنين فكاع الايام وكاين توقع يضاعف العدد فاخر ايامو الثلاث الاخيرة. المنظمون كيتسناو قرابة مليون زائر. ماشي غير الاقبال للي كاين حتى العارضين اللي حاضرين مغاربة واجانب واللي هدرات مع بعضهم « كود » قالو باللي كان معرض مزيان. كانت زيارات لمهنيين ليهم. كانت اتصالات تقدر تعطي تعاملات غدا. كان زوار عندهم فضول يعرفو عوالم هاد القطاع من التربة والسقي والطاقة واستخدام الديجيتال فالقطاع وتربية لبكر ولغنم..... كان اقبال على اروقة مؤسسات وشركات كبيرة فالمغرب فالصناعة الغذائية. ضيف الشرف هاد الدورة واللي هي الصبليون ما حضراتش بشكل قوي. ما جابتش عارضون يعكسو قوة القطاع فهاد البلد. يمكن الفضاء ماشي كبير بزاف. يمكن العلاقة اللي فيها شد لي نقطع ليك بين الفلاحة لكبار فالصبليون وبين المصدرين لمغاربة لعبات دور. رواق « الدومين » بتصميمو الزوين٬ مثلا٬ عرف اقبال كبير. شي يتصور مع الديكور. شي مع المعروضات. شي يسول على انواع الحبوب والقطاني والحوامض والفواكه الحمرا والخضرا... كانو اروقة اخرى ولكن ماشي بهاد الجمال جناح لبهايم عرف اقبال كبير حتى هو. بحالو بحال ديال التعاونيات. هاد العام راه كاينة 500 تعاونية. يعني العدد ضاعف مقارنة مع الدورة السابقة. كاين الحضور وكاين اقبال لمغاربة على شراء لعسل والزيت العود واركان... كلها وجيبو وذوقو. فالتنقل بين الاقطاب 12 المشكلة للمعرض واللي حضرو 1500 عارض فيهم اجانب قلال شوية٬ كان ساهل. غير هو خاصو يتزاد يسهال. تنظيمو وسط المدينة لقديمة غادي يولي صعيب بزاف. وزارة الفلاحة خدامة باش يخرج من السواني ويتنظم خارج لمدينة. 12.4 هكتار =المساحة الحالية= ما بقاتش كافية. غادي يبقى وسط لمدينة لقديمة غير الندوات واللقاءات العلمية. معرض محتاج يكبر كثر. محتاج يجيب تجارب من مختلف دول العالم. محتاج لفضاء كبير يقدر يستقبل لمغاربة وتجارب العالم فالفلاحة. محتاج يكون قطب فافريقيا فقطاع الفلاحة. هاد الشي علاش خاصو فضاء اكبر. حتى فالعلاقة مع الصحافة خاصها تتطور. ديك كذبة 625 صحافي حاضر وداك السياسة اللي معمول بيها خاص الوكالة اللي عندها المارشي تصلحها ولا يجي اللي يصلحها.
