منعسناش بكري البارح. و مقديت نوض . تفكرت بلي خصني نبرا بالزربة و نمشي للخدمة و جمعت الوقفة. غسلت وجهي. شعل كارو كايتنساني نلبس . " مالك. معاجبنيش من البارح"
بقا ساكت، عارفة بلي ماغندي منه لا حق لا باطل. من نهار جيت نسكن معاه هنا و هو هاكا. نهار كيبغي يعاود ليا كيجي بوحده يفتخ جوان و نتكيفوه بجوج و يقوليا مالو. نهار يبغي يسكت مكيهضروش واخا نسخف. .عاودت سولتو. مباغيش يهضر ومغيهضرش. نبدل ساعة باخرى حسن. لبست حوايجي. شدينا خطاف تا للسبيطار الكبير. يلاه غنطلعو فالدروج و هو تبانلي واحد المراة كتطلب و مغطية واحد التربية حاطاها بين ركابيها. شي مرات تنقول فراسي حرام هدشي اللي تندير انا و بوجمعة. ما مجوجين الله يسمحلينا. وايني شفت هاد التربية مسكينة،زرقة بالبرد ، هي والجوع خوت. هدا هو الحرام.
دخلنا للسبيطار. لقينا واحد الراجل مقاتل مع دك الراجل الغليض اللي كيكون فالباب، معوق مسكين، داير العكاز تيمشي بيه. دفعه هداك تا طاح و قاليه " حرام عليكم ..دعيتكم لله، بوحده قاد عليكم، نتوما وهاد المرض علينا".
شفت فرجليا و تخلعت. شدليا بوجمعة فيديا : " زيدي متخافيش ، غنديرو الراديو و تاخدي الدوا وغتولي لاباس."
فالاول كنت كنقدر نخبي على بوجمعة شحال من حاجة. دبا قبل ما نهضر تيعرفني فاش تنخمم.وانا وخا نبقا نحنزز فوجهو مكنقدر نعرف اش فراسو.
رجعنا ليرجونس باش يعاود يكتبليا الطبيب ورقة صفرة باش ندير الراديو الجديد. قاليا وريني القديم بعدا. جابلاه مرميتوش دك النهار فاش تخارا معايا بوجمعة عليه. وريتو ليه بقا تيشوف فيا:
"- هاد الراديو ماشي ديالك آمدام
-لا ديالي
- مكتوب فيه كريم. سميتك كريم؟
- لا كريمة
- إيوا را تخالطلك. تتجيبي ليا المرة الجاية القديم و الجديد
- و را هو هادا آدكتور. هدا عطاو هليا دك المرة و جبته لواحد الطبيبة هنا
-ميمكنش آمدام . غي رجعي قلبي فالدار أتلقايك هزيتي د راجلك ولا ولدك. - راجلي سميته بوجمعة و عمره ما دار راديو. و انا اول مرة نديره و ساكنين غا بجوجنا." كنت انقول ليه ساكنين فالحرام,ولكن شنو هو الحرام؟
بقا تيشوف فيا و تيفكر. قاليا إلا هدا اللي عطاوني دك النهار راه غلطو فالسمية مع كريم و كريمة تيتشابهو.تبارك الله عليه فهمها... بغيت نسبو و انا نشوف فبوجمعة و سكتنا بجوج.
-"غادي ديري راديو آخر. غنعطيك ورقة ديريه فالمستعجلات دبا و عاود رجعي فاش يوجد. اليوم ف العشية و لا غدا" قالي خصني نرتاح و كتب ليا دوا جديد. ميمكنش ليا نبقى فالدار خصني نخدم من غدا. كتب ليا ورقة و قاليا ديها للخدمة و ماغيقطعو ليك والو حيث انت مريضة. ضحكت وف الطريق كلها و انا باغا نبكي.. غدا غيجريو عليا و نرجع أنا و بوجمعة للجوع. الجوع هو الحرام.
