- كَود : كيف يمكن أن نصنف مذكراتك التي تكتبها ؟ أدب سجون أم أدب مُجون؟ - سقراط: هو الصراحة لحد الآن أنا ماكنعتابرش داكشي لي كانكتب أدب أو محاولة أدبية , أنا كانكتب كنعاود وصافي على عالم لحد الآن باقي معاودش عليه شي واحد بالتفصيل الدقيق كيما كانعاود عليه انا, يقدر يعتابروها شي وحدين أدب ويقدرو يعتابروها شي وحدين قلة أدب وفي النهاية الجمهور هو لي غادي يحكم. - كَود : البعض يعيب عليك استعمال كلمات يصنفونها على أنها نابية. - سقراط : شناهي هاد نابية عاوتاني .......واش عتكون نابية أكثر من ما يوجد في كتب التراث العربي القديمة...الأدب لا أخلاق ولا ضوابط له ولغته مافيهاش لغة نابية أو لغة راقية، مفرد " قحبة" مثلا راه كاين فخماسية مدن الملح لعبد الرحمان منيف وكاين فأدب كابرييل كارسيا ماركيز وماريو باراخاس يوسا، راه أول رواية ديالو كانت سميتها القضيب بالعامية.
- كَود: مثلا في الحلقة التي خصصتها للحديث عن مثلي جنسي استعملت كلمات أغضبت الكثيرين. - سقراط.: أغضبت شكون ....لحد الآن ماجا عندي حتى شي واحد عبر على الغضب ديالو أو خبرني بيه , انا قريب من القراء وديما حاضر فالفايس كنقرى ردود الافعال ديالهم وأي واحد معجباتوش شي حاجة كيدخل لصفحتي وكيقولها ...وحتى الى أغضبت شي اطراف معندهاش الشجاعة تعبر على الغضب ديالها آش غادي نديرليهم، راه الحقيقة دائما كتكون قاسية ونيتشه كيقول يكفي لكي تغضب احدهم ان تصارحه بحقيقته...ملي كنكتب نص بالعربية الفصحى راه غنسميه مثلي، لما لهذه التسمية من حمولة علمانية كتعبر على رؤيتي ليهم ولكن بالدارجة باقي مطورناش مفردات أكثر تمدنا راه الى ماقلتش زامل خاص نقول فيه اللعبة أو لوبيا أو حلوة وشلا أسماء أخرى ...نتا مثلا فحياتك اليومية العادية واش كتقول مثلي الجنس أو زامل ؟
- كَود : أرى أنه يمكن استعمالها أدبيا. - سقراط : اذن فيناهو الموشكيل؟
- كَود : وخا اسيدي، هل تعتبر نفسك من مدرسة محمد شكري أو بوكوفسكي كما كتب أحمد رضا بنشمسي عنك ؟ - سقراط : أنا ما من مدرسة حتى شي حد ولحد الآن باقي مانتجتش شي انتاج ادبي لي نقدرو ننسبوه لشي مدرسة , وبيني وبينك وعلاش لي منكونش انا براسي مدرسة؟ علاه مال بيكاسو والشعيبية باش فايتيني؟
- كَود : محمد شكري اكشتف أنه ليس كما يدعي، أنه مثلا تعلم الكتابة في عمر 21 عاما، كما أن العديدين تحدثوا عن تلفيق كثير في سيرته. أيضا بوكفسكي نشرت وثيقة من أرشيف الإف بي أي عنه و اتضح أنه ليس الا مجرد عجوز مسكين لا يشرب وليس زير نساء وليس عدميا ،هل تدعي أنت أيضا؟ هل خلقت لنفسك شخصية أخرى؟ - سقراط : هادوك ادباء كبار وزايدون راه حنا وصلنا الإنتاج الأدبي ديالهم وهو لي عجبنا ماشي شخوصهم أو شنو دوزو أو آش دارو.. راه النص فمعزل عن مولاه ماشي بالضرورة يكون الإنسان عاش الفقر والبؤس والأزمة عاد يكتب عليها ..... الكاتب هو قدرته على اطلاق العنان لمخيلته في ابتكار أحداث أو جمل أو حالات نفسية خلاقة الإبداع راه مرادف للخلق والأدب راه ماشي فيلم وثائقي .
- كَود : كتبت كثيرا في مذكراتك عن خديجة ،هل كنت بالفعل تحبها؟ هل يؤمن شخص مثلك بالحب؟ - سقراط : آه ،كنت كنحب خديجة طبعا. وعلاه مالي ماناَمنش بالحب...مالي مخصي؟
- كَود : ربما تؤمن بأن العلاقة الممكنة بين رجل و امرأة هي جنس فقط وليس حبا بالمعنى الرومانسي. - سقراط : و علاه كاين شي حب بلا جنس.
- كَود : إذن تؤمن بالحب من أول نظرة و حب توأم الروح و غيرها من التعبيرات؟ - سقراط : هذا سؤال خاص تسولوا لأحلام مستغانمي - كَود : متى ستنتهي المذكرات؟ - سقراط : ملي مايبقى عندي مايتقال ،شكون لي عرف ،ملي يتوقف الإلهام.
- كَود: هل تفكر في النشر الورقي؟ - سقراط : لست أنا من يفكر، هم من يرجونني بنشرها ورقيا.
- كَود : تبدو معتدا بنفسك كثيرا. - سقراط : نعم.هذا معنى أن تكون إنسانا.
- كَود : هذا جر عليك غضبا كما تعرف من جهات من بينها مناضلي حركة عشرين فبراير. - سقراط : راني كنغير مجرى التاريخ فالشرق الأوسط ، ماغضبان مني تاواحد ، هاديك مجرد تهيؤات..كولشي كيحبني. هادوك المناضلين نهار كانتلاقاهم كيسلمو عليا وكيتصورو معايا وملي كيدخلو للفايسبوك كيغضبوا،وزايدون الحقيقة تغضب الجميع وبما أنني تجسيد للحقيقة فراه ضروري غادي نغضب المزيفين.
- كَود : مثل الشيخ الفزازي، أنكرت تضامنهم معك ، ومثله دوما قلت كلاما جميلا عن الملك بعد خروجك من السجن. - سقراط : فوقاش قلت كلام جميل عن الملك؟ أنا لم أنكر تضامن أحد, العكس أنا مدين للكثيرين، أنا فقط رفضت تضامن العديد معي ولم أنكره ،وزايدون شناهو التضامن؟ واحد كاتب عليك ستاتو فالفايسبوك وباغيني نبقى مدين ليه طول الحياة.ينعل بوه وبو ستاتوه.
- كَود : هل يوجد شيء ما في السجن يجعل الخارجين منه طيعين؟ - سقراط: الحبس مافيه حتى شي حاجة كتخليك طيع، العكس الحبس كايردك ساخط. وزايدون باش طيّع أنا دابا ؟ باقي كنكتب كيما كنت كنكتب. وما أكتبه عن السجن مازعم تاواحد يكتبوا وعطيني مثال الا كاين شي حاجة مكتوبة على الحبس بالتفاصيل كما كتبتها أنا.
- كَود : كتب الكثيرون عن السجن: قدماء معتقلي اليسار الجذري و عسكريو تازمامارت. - سقراط: كتبوا عن ذواتهم كأبطال ولم يكتبوا عن السجن.وغرقوا فالذاتية وكانوا كيعتابروا راسهم مميزين على معتقلي الحق العام وكيعتابروا راسهم سجناء كلاص والآخرين سجناء دوزيام بشر ...
- كَود: بمعنى؟ - سقراط: كتبوا من زاوية رؤيتهم، باسمهم، أنا أكتب باسم السجناء الاَخرين و باسم السجن نفسه.
- كَود: تركت مراكش و عدت الى طنجة ما السبب؟ - سقراط : مراكش تذكرني بخديجة ،لذا لم أستطع تحمل ألم الذكرى.
- كَود : هل لا زلت تتاجر في الملابس على الرصيف؟ - سقراط : حاليا أتاجر فالهدرة ....كنبيع الكلام المكتوب .
- كَود : السؤال الذي ينتظر الجميع الإجابة عنه، هل سجنت بسبب أفكارك أم بسبب الإتجار في الحشيش؟ - سقراط : هادشي غادي تعرفوه فاليوميات.
- كَود : ماذا تغير في سقراط بعد تجربة السجن؟ - سقراط : تزادت فيا 20 كيلو , وكتضرني المعدة دابا .
-كَود: لم تعد مناضلا من أجل الحريات الفردية و الحركة البرتوشية و مدافعا عن حقوق الملحدين. - سقراط: راه بنادم كيبقى يفونطازمي عليا ويصورني كيما بغا , أنا عمري ما إدعيت شي حاجة أو نسبت لراسي شي حاجة أو ناضلت من أجل شي حاجة غي بنادم كيبقى يتخايلني كيما بغا هو وكيرسم ليا صورة فدماغو كيما باغيني نكون وملي كنخيب الأمل ديالو بتحطيم تلك الصورة كيبدى يتهمني بالخيانة والعمالة والتمخزين وبعت الماتش ...اينا ماتش لي بعت الله يعطيهم الغاراق .
- كَود: كيف ترى إمكانية تغيير واقع الحريات الفردية في المغرب؟ - سقراط : سول سيدنا.
- كَود : سياسيا أين تتموقع؟ - سقراط : فداري.
- كَود : تعبر دوما عن مواقف معادية لليسار، و أحيانا تمجد الليبرالية. -سقراط : أنا ماشي معادي لليسار لأن اليسار معادي راسو أصلا وماناقصنيش حتى انا نعاديه وغي اطلالة على واقع اليسار فالمغرب تعطيك صورة ..وأمجد الليبيرالية حيث هي الفكر الإنساني الوحيد المتناغم مع الجينات ديالنا كبشر .والليبيرالية راه ماشي مجرد فكر أو توجه سياسي وإنما هي قانون من قوانين الطبيعة .
- كَود: بمعنى أننا قد نرى سقراط يوما ما عضوا في الحزب الليبرالي المغربي؟ - سقراط : آشمن حزب ليبيرالي الله يهديك ؟ التجمع البشري الوحيد لي تقدر تشوفني فيه هو شي ميليشيات مسلحة تابعة لليمين المتطرف. - كَود: كيف حدث حتى أصبح اسمك العائلي هو سقراط؟ - سقراط: شكون عرف ،توارثناه أبا عن جد.
-كَود: هل تحن أحيانا الى السجن؟ - سقراط : كنتوحش صحابي وعشراني ولكن ماشي كنتوحش نشوفهم فالحبس أو نكون معاهم فيه كنتوحشهم نتلاقاهم فالسيفيل نضربو الطاسة.
- كَود : أتذكر أنك أجريت حوارا من السجن مع حميد زيد، حين سألك عن كلمة أخيرة قلت له : لستُ. ماذا كنت تقصد؟ -سقراط : شناهي لستُ؟ مسالين راسكم كتيقو حميد زيد. حوار مع حميد زيد من السجن؟ لاواه كنت كنشاطي معاه.
- كَود : هاهو رابط الحوار . - سقراط : آه .. أول مرة أطلع عليه منذ أجريته هاتفيا معه.
