المغاربة باقين باقين مبتدئين فالسياسة ، وهذا طبيعي نظرا لنظام الحكم لي كان عندنا وباقي ، راه تاواحد فينا ماكان جد جدو فشي نقابة أو متحزبين لشي أحزاب عندها تاريخ سياسي ، كا مكاين هو وليد فترة معينة راها جديدة نسبيا ، وفنفس الوقت المغرب عمرو ماكانوا عندو قادة حقيقيين كيجيشوا الجماهير بالخطب ديالهم ، ويقدرو من خلال داك التجييش أنهم يخلقوا تغيير حقيقي سواء للأفضل أو للأسوء ، كولشي كانت تحت جبة القصر ، وأبرز خطيب مفوه فتاريخ المغرب الحديث هو الحسن التاني ومن بعدو مكيجي تاواحد ، كاين أفراد أييه ولكن خطبهم كانت فالغالب على المنتسبين للهيئات لي كينتاميو ليها ، أما خطيب كيأثر فالشعب بكل أطيافه فكان الحسن التاني فقط . هاد الفتوة السياسية لي كيعرفها المغرب هي لي خلات البعض يستغرب من بكاء بنكيران فعدة مناسبات ، والبعض الآخر اعتبره ضعفا منه ، علما أن البكاء كان ديما ورقة رابحة عند العديد من السياسيين فالعصر الحديث عبر العالم ، وأشهرهم بيل كلينتون لي بكا في عدة مناسبات وكان معروف عليه أنه يتصنع البكاء فمواقف معينة ، ومن ورا كل جوج دمعات كانت الشعبية ديالو كتزاد ، وحتى هيلاري بكات فعدة مناسبات وراها غادا على خطى الزوج ، علما أنه أكثر قسوة منه ، وماشي غي عائلة كلينتون لي كانوا كيبكيو ، حتى بوش الأب والإبن بكاو فعدة مناسبات ، وأكثر وحدة يمكن اعتبارها أبعد مايكون عن البكاء أمام الجماهير هي المرأة الحديدية مارغاريت تاتشر وحتى هي بكات ملي كان ضاع ليها ولدها فالصحراء فاش كان مشارك فسباق للسيارات وسيفطات وحدات الجيش يقلبوا عليه ، ودموعها هذه مارداتهاش المرأة المرهفة الأحاسيس عند الشعب بل العكس زادتها حديدا فوق حديد ولات المرأة الفولاذية ، ومن غير هاد الحالات دموع السياسيين كثيرة وأغلبهم عرف يستثمرها وأدات بيه للبقاء مدة طويلة فسدة الحكم ، ومنهم وأكثرهم نجاحا هو رئيس وزراء أسطراليا لي بقا فهاد المنصب أربع ولايات ، وكان كيبكي فعدة فرص وهادشي خلا الشعب يبغيه وتشهر بجملة شهيرة ديال ما أنا إلا بشر عندي قلب ونظر ، وحتى حنا هاحنا ولا عندنا سياسي عظيم غادي يذكروا التاريخ وسط السياسيين البكائين لي ضمنوا لراسهم من خلال العاطفة والشعبوية قاعدة شعبية كبيرة وحب جماهيري قل نظيره. لبارح سولاتني الشريكة ديالي علاش كلولشي كيدوي فالفايسبوك على دموع بنكيران واش بكى ، فأجبتها أنه بكى عدة مرات وماشي هادي أول مرة وراه التجمعات لي كيدير خيالية ، وهادوك الدموع كيزيدوه مصداقية ، قاتلي واش كتظن أنه غيربح حتى هاد المرة ؟… قتليها خاص نوري الفيديو ديال البكا ديالو للواليدة ونشوف ردة فعلها الى بقا فيها فراه غينجح هاد المرة ، حيث المصوتين فالإنتخابات من غير هادوك الموالين للأحزاب والأشخاص راه أغلبهم بحال الواليدة أي من الناس لي بكاو على الحسن التاني ملي مات ، والناس لي كيبقاو فيهم أطفال غزة وحسن نصر الله كان بطل قومي ديالهم فحرب تموز ، وأردوغان راجل ديال الله ، هكاك بنكيران عندهم راجل دياني ديال الله يمثلهم فالحكومة وكيحاربوه كروش الحرام ، والملك زين ولي دايرين بيه شفارة وهاد الشفارة هوما لي كيحاربوا بنكيران ، راه المغرب هو هادو ماشي أنا ونتي وصحاب تصويرة الجوا صفر فالفايس ، قاتلي واذا ربح مثلا التراكتور شكون غيولي رئيس حكومة ، قتليها سي الياس العامري ، قاتلي واش هاداك لي كيقولوا عليه معندوش الباك ، قتليها بحالي أعمري هاني معنديش الباك ومعاك نتي لي قارية هنا وفالخاريج وعندك شهادة محترمة ،واش الباك مهم فالعلاقات الإنسانية هاكاك حتى فالسياسة ، قاتلي واهاديك نبيلة منيب كتبان مرة قارية وزوينة زعمة مايمكنش تكون رئيسة حكومة ، قتليها نتي عارفة أعمري أنني ماشي ضد تقلد العيالات لمناصب سياسية كبيرة ، ولكن راه من الخطأ أننا نكونوا معاها غي حيث مرأة ، راه خاصها تكون مرأة قادة بحال كاع العيالات لي وصلوا فالمجتمعات الأخرى ، قاتلي .. اذن عاوتاني بنكيران لي غيديها وبالبكى من الفوق … بففففف سي تغو ….
