//// العيد كان فرحة ودابا قرحة، في التسعينات أجواء العيد في المغرب كانت مختلفة ، كانوا العيالات تايتافقوا قبل العيد ويديرو بروجرام باش كل نهار في آخر سبوع رمضان يتجمعوا في دار واحدة فيهم ويتعاونو باش يصاوبو حلوة العيد ، كانت كادوز زوينة ، كنت تانحضر لهاد الطقوس أنا وليدات الجيران ، نتسخروا نجيبو المقادير إيلا خصات شي حاجة وناخدو طبسيل صغير وشوية العجينة تا احنا ونصاوبو حلوة بطريقتنا نزوقوها و نعاونوهم ، نحطو لوزة وناكلو واحدة أخرى ، ونديو طاوات الحلوة للفران ونمشيو نجيبوهم وناكلو نصهم في الطريق ، ونقادو الطاوة باش مايبانش راه احنا خدينا منها ، ونخرجو نمشيو معاهم نشريوا حوايج العيد ، ونمشيو للقيسارية نشوفو جلالب والدينا واش وجدو ولا مازال و ناخدو من الخياط التوب اللي شايط وجرارات الحرير باش نخيطو كساوي للمونيكات …. أجواء روعة … وصباح العيد هاديك هي الزردة الحلاوي والملوي والبغرير … واحنا لابسين حوايج جداد و واقفين نتسناو باش نديو الطباسل ديال الحلوة للجيران والأهل ، باش يبوسونا ويقولو لينا الزااااز هادشي زوينين هاد الحوايج و يعطيونا فلوس العيد …. تانبقاو نجمعوا ونحسبو شكون الصاك ديالها ثقيل بالصرف وشكون جمعات أكثر ، اللي شفناه في الزنقة من الجيران راجعين من صلاة العيد نمشيو نبوسوه ونقولو ليه عمي مبروك العيد باش يدور معانا … وخا دوك الفلوس كانو تايقولو لينا امهاتنا أراو نجمعوهم ليكم وماتنبقاوش نشوفوهم … أما جيل الأيفون الأمر مختلف ولاو العيالات تايمشيو في ساعة يشريو البغرير والمسمن والبريوات والحلوة مصاوبة من الزنقة وكلا ساد عليه في دارو ، والأطفال كل واحد شاد طابليت ولا تيليفون وجالس في قنت ، وولاو تايفهمو في الماركات وفي أنواع السبرديلات ونهار العيد ماكاين غير مالك لابس هاد السبرديلة راه ديموضات يالعود ….. أما الجيران إيلا تلاقاو بالصدفة تايقولو مبروك العيد ، وكاتلقى كل واحدة تاتبركك جارتها أشنو ملبسا ولادها، دابا كلشي بالمظاهر حتى بين الأطفال ولاو تايفهمو في كلشي تا في وقت الختانة مابقيتيش تكدب عليهم بشوف فريخ … ماشي عيب التطور ولكن غير يكون في الإتجاه الصحيح ماشي نعلمو ولادنا يفقدوا البراءة ديالهم ويتعلمو التبركيك من صغرهم ، خليو ولادكم يعيشوا طفولتهم كيفما عشناها إحنا ملي كان عار الجار على الجار ، ملي كانت جارتنا إيلا وبخاتني و طلعت نبكي عند أمي تاتقوليا سرك غزات فيك كون مادرتي علاش ماتغوتش عليك … أما دابا جرب غوت على شي ولد صغير إيلا دار القباحة ، يجيو عائلتو يدعيوك ولا يلبقو ليك مونتيف … هاد المقال شرحت فيه الفرق بين العيد في بداية التسعينات والعيد في 2017 … والمقال القادم فيه العيد خاطاااار حتى بالنسبة للكبار . تحية لكل من عاش نفس الأجواء اللي عشت في طفولتي و تحية لكل واحد قرا كلامي و تفكر العيد زمان و ابتسم أو ضحك من قلبو خسارة كبرنا و ندمنا كون غير بقينا صغار .. رسائلي للكبار فهما لا الكبار سنا . الله يجيب اللي يفهمنا ولا يعطيناش .
