اولا باش نتافقو، المواد الأولية فالمغرب غالية، الحليب، الفرماج، الخضرة، اللحم، الحوت، الكبدة، الكروفيت، الفواكه، گاع الماكلة الزوينة و الشهية و لي فيها الفيطامينات و البروتينات و الاوميغا طروا غالية و حتى الطبقة المتوسطة ماكاتقدرش توفرها فالثلاجة ديما ! و لا بغيتي تاكل مزيان و تاكل ماكلة صحية و متوازنة و تبعد على السكريات و النشويات خصوصا لا كنتي عندك ولاد صغار ! راه كاتلقا راسك خاصك مزانية كبيرة ديال المصروف ! ميزانية لي فمستطاع قلة قليلة من المغاربة و هادشي علاش بنادم كايعدي بالخبز باش يعاون بيه ! الخبز مع المرقة الخبز مع شلاضة الخبز مع الحريرة الخبز مع اتاي … الخبز مع الخبز. علاش كاتجينا هاد المواد غالية حيت الاجور هزيلة بالمقارنة ! و فدولة لاجون د سيكيريتي فيها كايشد 2000 درهم ! راه كيلو ديال اللحم كاياخد ليه ربعة فلميا من الصالير ديالو ! و كيلو ديال الكروفيت ستة فلميا ! هادشي بلا مانحسبو الكرا و الما و الضو… يعني باش هاد السيد ياكل و يوكل ولادو راه خاصو يعمر كرشو بباداز و الخبز واتاي و المرقة عامرة مياه و غابات ، كون كانو الاجور طالعين كنا ماغانحسوش بالغلا و لكن حيت الاجور هابطة هادشي علاش القفة ديال المواطن على قد الحال! و علاش غاليا ؟ حيت حنا دولة فلاحية و لكن ماشي شي حمووورية عاوتاني ! مازال الفلاحة عندنا ماكاتوكلناش كاملين ! فلاحة معيشية ! الاراضي مقسمة لأجزاء صغار ماكايساعدوش على اقامة سياسات زراعية على مستوى كبير ! و لا حليتي الخارطة د المغرب غايبان ليك صفر! ماشي شي فرق كبير بينو و بين موريتانيا ! دولة ! جافة ! بفلاحة معيشية بدائية كاتعتامد بشكل كبير على الشتا ديال سيدي ربي باش توفر الغلة ! و حتى القطيع لي غايعطينا اللحم و الحليب و الفرماج قطيع هزيل. يعني كي الحمق منين ماضربتيه يسيل دمو ! اجور هزيلة فلاحة بأساليب بدائية تساوي اسعار طالعة ! بالنسبة للمقاطعة انا شخشيا كانشوفها وسيلة حضارية و سلمية للاحتجاج ! وي ! طبعا ! هادي مايحيدهاش الطبيب، و مزيان لي ولاو المغاربة قادرين يتافقو و يبويكوطيو تاهوما ! فزمن لي الاحزاب فيه فشلات باش تكون صوت الشعب و لي البرلمانيين الانتهازيين تخلاو على الدور ديالهم كممثلي الامة ! من الضروري انه المواطن يلقى البديل باش يوصل صوتو للمسؤولين ! ولكن كاينين خمسة ديال النقط ديرونجاوني فهاد المقاطعة : اولا : الديكتاتورية “الشعب” لي ولا باغي يفرض عليك صحة ” المقاطعة” هاد الديكتاتورية و التسلط كايبين بلي بنادم عندنا ماناضجش بما فيه الكفاية باش يتقبل الرأي و الرأي الآخر ! راه من حقك تقاطع هادي مايحيدها ليك حد ! و لكن لي ماشي من حقك هوا تخون هاداك لي مامقاطعش و لا تهددو ! كيفما طبعا ماشي من حقك تخون هاداك لي مقاطع ! المقاطعة كاتبقا خيار شخصي ! كل طرف خاصو يحتارمو ! ثانيا : علاش سيدي علي ؟ الحليب نقدر نفهم ! المازوط تاهوا ! و لكن سيدي علي بالضبط ماشي ماشي مادة ضرورية حيوية ! منتوج نخبوي ! انا لي كانعرف هوا الاغلبية الساحقة ديال المغاربة كايشربو الما د الروبيني ! فاش غادي ينفع المغربي لامبدا لي اصلا مقاطع سيدي علي خلوق المقاطعة ديالو دابا ؟ هادي بعدا فيها إن ! حيت قبل ماتفكر كمغربي تقاطع ” سيدي علي” لي كاتشريها غير لاكنتي مسافر و لا مريض ! علاش مافكرتيش تقاطع الما ديال المكتب الوطني الصالح للشرب لي فشي مناطق من المغرب المذاق ديالو داير كي الخرا ؟ هادشي علاش فهاد النقطة بالضبط كايبان ليا بلي هاد المقاطعة موراها شي حد ماحاملش مريم بنصالح. ثالتا : گاع الحاجة لي كايفرحو ليها الخوانجية و كايتحمسو ليها كانشم فيها ريحة الغدر ! ريحة القربالة ! حيت دينمهم اذا دخلو قرية افسدوها ! الخوانجية فرحانين بهاد المقاطعة ماشي حيت كايبقا فيهم الدرويش و لا حيت بيهم غلاء الاسعار و إلا علاش ماعمرني شفت الخوانجية خارجين كايحتجو على الغلاء ؟ علاش تال دابا عاد الخوانجي نشط و حيح و فرح و تاهوا ولا قالك ضد غلاء الاسعار ! الخوانجي كايموت على فحال هاد المواقف باش يركب عليهم و يستاغلهم ! القربالة و الصداع هوما الظروف لي كايقتات عليهم الخوامجي باش يضبر فالاصوات و يحشد الجماهير و يخشي شي فشي ! اليوم قربالة على الحليب غدا يقوليك آجي نقاطعو الادارات لي فيهم العيالات بدون حجاب ! بعد غدا يقوليك اجي نقاطعو المدارس تايديرو لينا مدارس للبنات بوحدهم و الدراري بوحدهم ( راه واحد من هاد الخوانجية اصلا هادشي علاش كايقلب) رابعا : كانشم فهاد المقاطعة كمية كبيرة ديال الحقد الطبقي ! حيت فالعقلية المغربية، كانكرهو مالين الفلوس و ديما كانشوفو فيهم “كروش الحرام” ! في حين انه البلاد بلا رؤوس اموال و بلا رجال اعمال لي يديرو مشاريع و يخدمو الناس ماتسوا والو ! علاش لاهزات مريم بنصالح قشها غدا و مشات استثمرات فالسينيغال و لا هز اخنوش الثروة ديالو و مشا حل لوزينات فسبانيا شكون غايخدم الاسر لي غايتشردو ؟! المقاطعة لي مبنية على الحقد الطبقي ماعند باباها معنى ! راه ماعمر مول الشكارة غادي يقسم معاك الربح هادي ماكايناش فالعالم ! خامسا : ناس بزاف مگدمو فهاد المقاطعة غير حيت حاقدة على صحاب الفلوس و حيت باغا السلعة ترخاص ! و لكن فنظركم واش كافي انك تبغي السلهة ترخاص باش ترخاص؟ واش كاظن بلي لابغيتيها فابور غاتولي فابور ؟ واش ماكاينش قانون العرض و الطلب لي كايتحكم فالسوق ؟ واش الفايسبوك هوا لي كايحدد الاثمان فالسوق ؟ كون ماكانوش هاد خمسة ديال النقط كنت غانتفايل بالخير من هاد المقاطعة و غانقول مع راسي برافو ! برافو على لي خمم و لي خطط و لي قاطع ! و لكن حيت كاينين هاد النقط ! كانشوف فهاد المقاطعة إن. و أخيرا ! بالنسبة لهادوك لي غايكتبو فالتعاليق ” شحال عطاوك ؟” “كانقوليهم بلي ماشي ضروري يا تكون حمار مگيد يا رشايوي خامج ! ممكن تكون انسان حر كاتفكر بمخك قبل ماتتبنى اي قضية.
