سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
سكوب. ها كيفاش اختارق محمد بن سلمان المتهم فتقطيع خاشقجي الممثلين لمغاربة ووظفهم يخدموه . شركات انتاج معروفة ريوگها سالو وجابت اشهر الممثلين وخدامين مع ال الشيخ اللي سب لمغاربة: تفاصيل حصرية على العملية وها الشركات وها الممثلين اللي باغيين
يوم ثامن فبراير الماضي وقع هاداك المتخلف اللي اختار يصوت على امريكا فمونديال 2026 ضد المغرب وخدم كاع علاقاتو ودار لوبي كبير لدعم الملف الامريكي السعودي تركي الشيخ =وكان حينها رئيس هيئة الرياضة= وقع هاد الشخص باعتباره الرئيس الجديد لمجلس ادارة الهيئة العامة للترفيه =وهو احد رجالات ولي عهد السعودية محمد بن سلمان= عقودا كثيرة باش ينشط بلادو. من بين العقود اللي دارت وحدة مع شركة “الصباح گروب” فشخص مولاها صادق الصباح. هدف الاتفاقية كيف كتبات وكالة الانباء السعودية حينها “إنتاج العديد من الأفلام بمشاركة فنانين مصريين وعرب وسعوديين تكون عروضها الأولى في المملكة”. السعودية بدات الخدمة مع مصر حقاش عاصمة السينما والفن والاكثر من هادا حقاش بلاد بن سلمان وبلاد السيسي سمن على عسل. كثر كاع. هاد الشركة اللبنانية بدات جولتها عند لعرب ووصلات للمغرب كيف غادية تكشف ليكم “كود”. دارت اتصالات مع كاع شركات الانتاج. دابا الخدمة غادية مزيان مع “فيديو راما” و”كونيكسيون ميديا” و”ايماج فاكتوري” و”سيگما” وغيرها. لفضايح هو ان العلاقات المغربية السعودية مقودة. ضربونا فقضية الصحرا والاتصال اللي وقع هادي يومين من الملك محمد السادس والملك سلمان ماعندو ما يقاد فالامور لانو كلشي بيد ولي العهد محمد بن سلمان. دابا هاد الهيئة السعودية للترفيه هدفها ماشي نشر الفن. حقاش الفكر الوهابي اللي نتاجتو السعودية دمر طيلة عقود الفن. ما يمكنش يكون همهم الفن. حسب مصدر ل”كود” فالهدف الاول والاخير تحسين صورة محمد بن سلمان. كيوجدو ليه الظروف باش يولي ملك. كيغسلو صورتو اللي ما عمرها تغسل بسباب جريمة تقطيع الصحافي جمال خاشقجي فقنصلية السعودية بتركيا العام الماضي. وفق مصدر “كود” من هاد الشركات فان “الصباح گروب” جابت سيناريوهات واجدة وبدات الخدمة. احد النجوم اكد ل”كود” باللي اتصلو بيه وباللي شركة الانتاج قالت ليه جي تخدم، “باش سولتهم فين غادي يبث هاد الشي؟ جاوبوني شي قناة جديدة”. النجوم المغربي ما كانش كاع عارف باللي القضية فيها تركي الشيخ ومحمد بن سلمان. دابا هاد الشركة قالت لشركات الانتاج المغربية اللي ضاربة الطم “جيبو لينا النجوم. جيبو كلشي النجوم. غاديين نخدمو مع كلشي” يشرح مصدر “كود”. باغيين محمد مفتاح ورشيد الوالي وعزيز داداس ومحمد خيي ومنى فتو وسامية اقريو والسعدية لديب وماجدولين الادريسي وعمر لطفي وادريس الروخ وامين الناجي …….. هاد الشي كيطرح مشاكل كثيرة من غير تحسين صورة محمد بن سلمان. فالتصوير وفق مصدر “كود” غادي يكون فالصيف وغالبا غادي يبدا فشي شركات فشهر ماي ويونيو. المهم كلشي خاصو يكون واجد يشرح واحد من صحاب هاد الشركات ل”كود” “شهر غشت الجاي”. الموضوع غريب مثير سياسي بامتياز. بن سلمان كيشري فنانين مغاربة باش يطبلو ليه. حقاش اللي كتب كتب بهاد الخلفية واللي غادي يدير الاخراج هادا هو هدفو واللي غادي يمثل خاصو ينخارط فهاد الشي. شركات الانتاج ما عندها سوق. قادرة تخدم مع اللي كان غير يدورو الناعورة مزيان. تفاصيل جديدة غادية تجيبها “كود” فمواضيع جاية فالطريق
