اليوم السبت مع الوحدة الصباح كانت جوج طيارات من الخطوط الملكية المغربية من مطار محمد الخامس فاتجاه مطار القاهرة الدولي. طبعا شي وحدين فضلو يمشيو يوم قبل باش يحضرو لماتش الاسود ضد ناميبيا فاول مباراة فمجموعة تضم كذلك جنوب افريقيا والكوت ديفوار في كأس افريقيا المقامة بمصر. هادوك الركاب اللي مشاو من مطار محمد الخامس كانو بوحدهم اللي تقلبو كثر من لقياس. قبل ركوب الطيارة كاين بوليسي وبوليسية كيقلبو لكل واحد باليزتو الصغيرة اللي مدخلها معاه للطيارة والصيكان. هاد الاجراءات طلباتها مصر من السلطات الامنية المغربية. طبعا باش تسمح للجمهور ياخد الفيزا ويحضر طلبات مراقبة كثيرة. فكل رحلة كان مسؤول امني فالطيارة. يعني هاد اكثر من 70 رحلة اللي دارتها لارام لنقل جمهور المغرب لتشجيع الاسود غادية تعرف نفس الاجراءات الامنية المشددة. ماشي غير هاد الشي. غير توصلو لمطار القاهرة يبدا اجراء امني اخر. باش ياخد المسافر باكاجو يلقى مسؤولين امنيين كيراقبو. من مطار القاهرة كيبان ليك الوضع الامني كيف داير فهاد الدولة. ممنوع شي حد يدخل للمطار. كلشي برا. التقلاب ما كيساليش باش تخرج تاخد الترانسبور: طاكسي او سيارة للكراء او اوبر. باش توصل للوطيل كاين مراقبة اخرى. بلا ما نهدرو على الحواجز الامنية اللي مطرقة مدينة القاهرة. فالتيران هاديك حريرة اخرى. فملعب السلام اللي جا وسط مجمع ديال الجيش خاصك تدوز عدد من الجواجز قبل ما توصل للملعب. ما كايبانش كاع حتى توصل ليه. دابا غدا ما عرفناش كيفاش غاديين يديرو مع جمهور كثير. هاد الهاجس الامني كيعكر على العرس الافريقي٬ طبعا القاهرة باغية تربح دولة بلا عنف. هاد الشي علاش كثرات المراقبة.
