كشف محمد اليوبي، مدير مديرية الأوبئة ومكافحة الأمراض بوزارة الصحة، بللي النغاربة اللي رجعو من ووهان الشينوية راهوم كيديرو فهذ الأثناء التحليلات اللازمة فالمختبر الوطني المرجعي، باش يعرفو واش مقيوسين بفيروس “كورونا” القاتل، أو لا. وأكد اليوبي، فتصريحو ل”كود”، بللي المغرب كيتوفر على كاع التجهيزات والآليات باش يدير التحاليل اللازمة للكشف عن فيروس “كورونا”، واللي كتعتمد على تحليلات ” تيست برايمر” خاصة. ونفى اليوبي المعطيات اللي جابها تقرير منظمة الصحة العالمية، واللي كشف باللي المغرب ماكيتوفرش على المعدات اللازمة للكشف عن الفيروس، وأكد اليوبي فالمقابل بللي الوزارة عندها كاع العينات الكافية لإجراء تحاليل فيروس كورونا للناس المشتبه فيهم بحمله أو المواطنين العائدين من ووهان، معقل الفيروس فالشينوا. وزاد كيقول “هذا تشخيص مخبري بسيط مكيحتاجش لشي حاجة خارقة للعادة، وحنا عندنا العينات اللازمة والكافية والطاقات البشرية اللي غتتكلف بإجراء التحاليل، لكننا فالمستقبل نقدرو نعانيو من نقص فهذ التحليلات، وهاذشي علاش طلبنا من منظمة الصحة العالمية تزودنا بيها إلى كانت غاتسيفط هاذ “البرايمر” لدول الشرق الأوسط اللي ماكتتوفرش عليه”. وكانت منظمة الصحة العالمية علنات أن مجموعة من دول الشرق الأوسط ماكتتوفرش على التحليلات اللازمة باش تكشف عن فيروس “كورونا”، ومن ضمنها المغرب.
