تداولو ناس على مواقع التواصل الاجتماعي أنباء على هروب ثلاثة ديال الناس، لبارح الاربعاء بالليل، من صبيطارات جامعية فكازا، وكيتعلق الامر براجل ومرا سلتو من صبيطار مولاي يوسف مباشرة من بعد ما اكتشفو انهم مصابين ب"كورونا"، وواحد آخر كان فالحجر الصحي وهرب من صبيطار 20 غشت، فهذ السيمانة. نبيلة الرميلي، المديرة الجهوية للصحة بجهة كازا سطات، تواصلات مع "كود" فهذ الصدد، وكذبات هذ الأخبار اللي كتروج، وشارت بللي حتى شي حد من اللي تبتات الإصابة ديالهم بالفيروس ما هرب من شي صبيطار. وقالت بللي هذشي ما يمكنش يكون بحكم أن المراقبة فالصبيطارات كتكون صارمة، وما يمكن لحتى واحد يسلت، ومباشرة من بعد الكشف كيتم وضع الناس فالحجر الصحي. من جهتها قالت ليلى بنحميدون، مديرة مستشفى 20 غشت، بللي مايمكن حتى واحد يهرب ليهم، وهذشي بسبب وضعيتو الصحية المتدهورة واللي مغاديش تساعفو على الهروب. وكتقول بنحميدون، فتصريحها ل"كود"، بللي "جميع المصابين بكورونا اللي عندنا فالمستشفى كيعانيو من اضطرابات تنفسية صعبة، وبالتالي يصعاب عليهم يخرجو من الصبيطار، وكاين اللي فالإنعاش وصعيب عليه حتى يوقف على رجليه"، على حساب هضرتها.
