هاد ليام جا عندنا حاكم دبي ال المكتوم. مع عائلتو جاي يدوز عطلة واكيد جاي يقاد العلاقات المغربية الاماراتية اللي ماشي مزيانة. قبلو تم تعيين سفير جديد فالمغرب والمغرب كان عين سفير جديد ليه فالامارات. هاد الدولة اللي عند المغرب علاقات تاريخية بها دخلات فينا بزاف فالسنوات الاخيرة. باش بدا هاد الربيع العربي خشات نيفها. ولات باغية تلعب دور فحياتنا السياسية. اسسات وكالة باش تشوه حزب العدالة والتنمية وما يربحش الانتخابات التشريعية ف2016 ودعمات حزب الاصالة والمعاصرة. كان الياس العماري امين عام الحزب فديك الساعة يقدم راسو فمواجهة الاسلاميين. ديك 6 المليون دلاورو اللي تعطات لمشاريع اعلامية ومطبعة اللي من المساهمين فيها نفس الامين العام =الياس العماري= وللي كلها فشلات مازال خاصها الضو. شكون خلص وفين مشاو لفلوس. محمد بن زايد الحاكم الفعلي للامارات ما وقفتش عند هاد الحد. شفناه دخل فالاعلام. تدخل كبير ما عمرو كان فتاريخ الصحافة فالمغرب. دخل فهادوك المشاريع اللي فشلات وجورنالات خرى. الامارات دازت حتى للثقافة وللفن وبغات تخربق. هاد الشي كافي باش المغرب يقطع علاقاتو الديبلوماسية. باش يقول للاماراتيين. عطيونا بالتيساع. وقبل شرحو لينا علاش دخلتو فينا. علاش درتو هاد الشي كولو. طبعا ما كايناش غير هاد الدولة. كاينة ديك قطر اللي لعبات خايب فالمغرب. سنوات من الحقارة مارساتها عندنا ووظفات كاع امكانياتها باش يكون عندها دور سياسي. وظفات شي اسلاميين وشي يساريين ولاو خدامين عند شيختهم بنانة. هاد ليام دخلات حتى تركيا ادروگان فهاد اللعب. المغرب خاصو يقطع علاقاتو مع هاد الدول بثلاثة.
