سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
ملايرية كيحركوهم من اللاور كيعتاقدو اللي انتاقدهم راه مسخر. من الناصري دالبام اللي ما عمرو دافع على دائرتو وباغي يترشح للطاشرون ملايري السيزي للزين اللي ما هو زين ولا كيعرف يتقن شي حاجة
سعيد الناصري رئيس الوداد البيضاوي باسم حزب الاصالة والمعاصرة والبرلماني عن دائرة انفا اللي ما عمرو دافع على سكان هاد المنطقة وما عمرو دافع على الرياضة فالبرلمان واخا هو عندو جوج كاسكيطات وحدة دالحمرا والثانية رئاسة العصبة. هاد الشخص اللي ما عمرنا عرفنا فاش كيدير البيزنس وملايري٬ كيدور هاد ليام وكيقول باللي باش كيكتب عليه "كود" شي مقال٬ راه وراه شخص ما عندنا علاقة بيه. هو صاحبو هو وعشيرو وحتى الاتصال بيه دار سنوات هادي شي جوج مرات على خبارات. هاد التقنية ديال ايلى كتب عليك شي حد راه مسخر لشي حد او خدام لشي حد٬ تعلمها هاد البامي من الياس العماري رئيس حزب التراكتور سابقا. غير الياس كيدير السياسة وجن فيها ماشي بحال هاد الامي فيها. اللي ما كيعرف من غير مولاه ادريس اللي مذكور فشي ملف ديال الممنوعات كيف كتبات جريدة "هبة برس" هادي سنوات. الناصري اللي كيطلب باعتبارو رئيس الوداد من المنخرطين يجيبو فلوراق شهادة عدلية وكون طبقوها عليه هو ما عمرو يحلم بالعضوية فهاد النادي العريق٬ وصلات بيه الحقارة انو يقلل حياه علينا ويقول لينا مسخرين. فنفس المستوى كاين واحد الطاشرون ملايري جمع فلوسو من السيزي واسمو العلام مصطفى كيدير لعراسات واخا كاين الحظر وهاد ليام سلخ عائلات ف"ايدين ايلند" فبوزنيقة باقليم بن سليمان ودابا القضية فالمحكمة٬ حتى هو باش كتبنا عليه٬ مشى كيروج باللي شي صحافي ورا هاد الشي. ما كيعرف لا "كود" ولا صحافييها. حقاش امي متخلف. يعتاقد ان لفلوس يدير بيهم ما بغى. يعتاقد ان معرفتو بعامل بنسليمان او شراكتو المزعومة مع شي امير غادية تحميه. وتا سير تق.... لا انت لا اللي كتعنى بيهم الى كانو بصاح. هادي قمة الاهانة للصحافيين وللصحافة باش ايلى كتب عليك شي حد حقاش درتي فتوة وضربتي ناس وكاينين شهود٬ تقول راه ضدو شي حد. والمثال الثالث فهاد العينة من لمكلخين اللي كيقولو راه كتبنا عليهم حيت مسخرين هو مول طاحونة "الاتقان" هاد مول الدگيگ٬ اسمو الزين وهو خايب ما زوين ما والو فافعالو٬ قال حتى هو اللي يالله قطر بيه الصفق فعالم لملايرية وباغي يكون همة وشان٬ باللي راه كتبنا على حفلة دارها فبوزنيقة ديال الشيخات احتفالا بعدم متابعة صاحبو الطاشرون العلام بحالة اعتقال٬ وباللي هادي راه شي حد يستهدفو. انت والناصري والعلام الوحيدين للي خاصهم يستهدفوكم بصاح هو الضرائب. يمكن الابناك فحالة العلام. باش نشوفو واش القروض اللي خديتيهم٬ قدمتي وثائق صحيحة ولا كان فيهم شوية الخشونة. التحقيق الداخلي فالبنك اللي يقدر يجاوب على سر هاداك القرض لكبير اللي خديتي. هادو كيجمع بيهم الكلخ. دخلو للاقتصاد. للسياسة. للرياضة. تصرفاتهم كتعطي صورة على عقليتهم. شي كان فمجلس المدينة ومجلس النواب وحتى الحضور ما كيحضرش. ما يعرفش يطرح سؤال واحد. سلم الوداد٬ فحالة الناصري٬ لحزب عرف يوصفو بنكيران ف2016 باش قال حزب الباندية. هان الوداد نهار هجم على صحافي "شوف تيفي" بصفتو الشخصية وجا اعتاذر بصفتو كرئيس فخلفية القناة الخضرا. تصرفو مع الصحافي كتعطي صورة على هاد الشخص هادو كيحركوهم من الخلف. غير واجهات وعارفين ريوسهم. هاد الشي علاش اللي انتقدهم كيعتاقدو باللي كيشبه ليهم.
