المفروض انو لقاء تاريخي. خاصو توجيدة تاريخية. استقبال الملك محمد السادس برئيس الحكومة الاسبانية پيدرو سانشيث فالقصر الملكي بالرباط قبل لفطور اليوم خرج فيه بيان للديوان الملكي وهدر باللي حضرو 3 من الصلبيون وهم رئيس الحكومة ووزير الخارجية وسفير مدريد فالرباط. فالمغرب بالاضافة الى الملك محمد السادس٬ حضر كل من مستشارو فؤاد عالي الهمة ووزير الخارجية بوريطة والسفيرة المغربية فمدريد كريمة بنيعيش. لكن التصاور الثلاثة اللي خرجات على اللقاء كيبان فاللولى الملك وسانشيث والثانية الملك وسانشيز ووجه الهمة وبوريطة ووزير خارجية ديالو وسفيرهم والثالثة فيها هادو كلهم مع شعر مرا ما بايناش كاع. فالربورطاج اللي دوزاتو الاولى" نفس الفيلم. غابت فيه السفيرة كريمة بنيعيش. نفس السفيرة كانت حاضرة فلقاء ملك اسبانيا مع ملك المغرب وبانت مزيان فالصور. علاش لمرا الوحيدة فهاد اللقاء ما تبانش. شكون المسؤول على هاد الشي. حتى فالفطور اللي دارو سيدنا على شرف رئيس الحكومة. الطابلة كان فيها الملك ورئيس الحكومة الاسبانية والاميرين مولاي الحسن ومولاي رشيد ورئيس الحكومة اخنوش ووزير خارجيتي المغرب واسبانيا وسفير الصبليون فالرباط ومستشار الملك الهمة.
