حتى زاد في ثمن تذاكر ماتش الديربي ما بين الرجاء والوداد برسم الدورة 21 من البطولة الإحترافية لكرة القدم، وخرجهم البارح يتباعو على المنصة الإلكترونية المخصصة لذلك، عاد خرج عزيز البدراوي رئيس الرجاء الرياضي يعلن أن الماتش ما بين الفريقين غيتلعب بالجمهور وماشي ويكلو وهادشي فبلاصت ما يخرج يشرح لجماهير الفريق الأخضر شنو المشاكل اللي واقع فيها الفريق في ظل التسيير ديالو المثير للجدل لهذا النادي اللي صبح غارق في الأزمة. وفبلاصت ما يشرح للرجاويين على الأسباب اللي خلاتو يزيد في ثمن تذاكر الديربي ويرفعها إلى 100 و 200 درهم في قرار غير مسبوق تشكاو منو الرجاويين و الوداديين، خرج عزيز البدراوي قبل لحظات من اليوم الاثنين على أنستغرام واحد الخروج غريب وقال: "للإجابة على العديد من الاتصالات التي اتلقاها هذه الايام بدون انقطاع و خصوصا البارحة واليوم حول مباراة الديربي المبرمجة يوم الاربعاء على الساعة العاشرة ليلا، أجيب جماهيرنا الغالية بأن الإجتماع الرسمي مع السلطات المحلية انتهى في هذه اللحظات و تقرر إجراء هذة المقابلة المنتظرة بحضور الجمهور لعدم وجود أي دواعي أمنية تمنع ذلك". وكيمر الرجاء الرياضي بأزمة مالية وتسييرية خانقة في عهد الرئيس الحالي عزيز البدراوي، لدرجة أن المدرب ديال الفريق منذر الكبير خرج يتشكى من خوض اللاعبين للتداريب في نهار رمضان وهم صايمين حيث ما كينش الضو في لاكاديمي وبتيران الوازيس باش يتدربوا بالليل، وهذا من غير الديبلاصمون خارج المغرب ديال الفريق اللي ما قدرش الرئيس يوفر له طائرة خاصة والزيادة في ثمن تذاكر ماتش الفريق.
