معرفتش علاش شي مرات كنشوف، بلي مجموعة منا مفيهش ديك الروح الوطنية ،و ديك الغيرة على الوطن و ما مسوقش كاع لهاد لبلاد،بحال إلى تقول ماشي أرض ديالو و لا الوطن ديالو.و كانقارن بينا حنا ولاد هاد الوقت و الناس دزمان و كيفاش كانوا كيدافعوا و عندهم غيرة كبيرة,وكيفاش ضحاو بالحياة ديالهم باش تستقل هاد لبلاد,و تا كيفاش ناضلو من بعد الإستقلال باش تولي لبلاد مزيان و يزولو منها الشفارة. كيفاش كانت تا تجيهم التبوريشة ملي كيسمعوا الأناشيد الوطنية,كيفاش كانو والدينا كيبكيو منين تا يربح عويطة شي سباق و كيتشوك لهم لحم ملي المنتخب كيلعب,وأي حاجة تتقال على لبلاد خايبة كانت تتعصبهم و تتخليهم كاعيين.و كانقول يا حصرى على ليام دزمان و ناس زمان,ولين وخا هكاك مزال كاين وحد النسبة فيها الروح الوطنية و هي لغتهز هاد لعلام ديال هاد لبلاد لعزيزا علينا وخا معطيانا والو و كنعذر أنا دوك لنقصات ليهم الروح الوطنية محيت تا هاد المسؤولين لعندنا قتلو لنا الروح الوطنية بالزبايل ديالهم و الأخطاء ديالهم. أما عبيبس الفاسي خلاص كيقولنا راه المغرب فيه غير ولادو و عائلتو و صافي أما حنا ماشي من هاد لبلاد. لكن رغم ذلك مكيبقاش سبب باش ما تكونش عندنا روح وطنية بلعكس خصنا نبينو ليهم بلي لبلاد بلادنا و المغرب ديالنا كاملين ماشي ديال طبقة معينة و لي تعدا لنا على بلادنا كيتعد علنا كان من برا ولا من لداخل.و نقولو ليهم راه بلادنا هادي بغيتو و لا كراهتوا،دم حمر و عروق خضراء بحال رايت بلادي ,درابو حمر و نجمة خضراء
