قالوا عليها ثريا وقالوا عليها حورية وقالوا عليها أنها أم وأخت وبنية هي المرا عمارت الدار وبلا بها الحياة ما تسوى وقية هي مولات الدار واخا تكون طبيبة واستاذة ومحامية وما ينقص من قيمتها حتى شي واخا تكون جالسة فالدار فهي ربة بيت وأميرتو المحضية خرجوا شي وحدين بالصوت الهدار يتكلموا بسميتها و يوهموا الناس أنها ماشي ثريا أسيدي..أ لا لا... هي ثريا بغيتو ولا كرهتو ما دخلوهاش فالسياسة الحرامية كانت خدامة ولا ربة بيت قارية بزاف ولا شوية... هي ثريا مضوية البيوت المغربية هي ما شي سلعة وماشي ضحية تكسبو على ظهرها بعض الصدقات البرانية ونتي أسميرة عندك مشكل مع عبدو خرجيلو نيشان وبعدي من هاد القضية راه ماشي لي جا يركب على هاد المطية كل نهار كنسمعو بجمعية شعارها حقوق المرأة المغربية وللأسف كتبانو غير منين كتكون القضية سياسية المرأة خاصها بالفعل حقوق وحقوق كثييييرة بالحق ماشي بالطريقة الغربية المرأة ديال بصح ما عندهاش مشكل مع الراجل ولا كتفكر بطريقتكم ... يا بيه يا بية المرأة ماشي سلعة تبيعو وتشريو فيها مرة تقولو الإرث ومرة تقولو الرجل كيفكر بطريقة رجعية زعما، الرجال...لي خرجو معاكوم كلهم مآمنين بالقضية؟ ولا غير مصلحتي ومصلحتك والحاجة مقضية سمعي أسميرة وسمعي أفوزية ايه وحتى نتي يا ديك الفضولية المرأة مطالبها ماكتقضاش بشعارات سياسية المرأة ماكتاجرش بالقضية ديالها كل وحدة دارت جمعية والمشكل ماشي غير فالراجل ولا القوانين الوضعية المشكل حتى فيكم وفطريقتكم الاستفزازية نتوما بغيتو مرا على الطريقة الفرنسية وحنا بغينا مرا على الطريقة المغربية بغينا مرا قارية وخدامة ولا ربة بيت المهم تبقى مرا حرة أبية ماشي مرا كتشبه للراجل ونسميوها فوزية نعم، بغينا للمرأة الحرية بالحق ماشي لي على بالكم وعلى بال لي على بالكم بغينالها الحرية بالطريقة المغربية تكون فنانة وقايدة وعاملة وكاتبة وشاعرة وتكون أم وأخت وزوجة ومربية بغينا حقوقها تكون كلها مصانة وتتغير العقلية بغينا للمرأة مكانة طبيعية تبقى المرا مرا والراجل راجل والحياة تبقى كما هي راه المرأة كنز وعليها وصى الرسول الكريم وماتقولوش هاد شي رجعية الرجعية هي ايلا لبستوها ثوب غير ثوبها وطلبتوا منها تعوم فالطين وهي خالقها الله حورية غادي نرجع ونقول المشكل كاين فالعقلية نعم، عقلية الراجل وعقلية شي عيالات لي عزيز عليهوم يعوموا فالمنطقة الرمادية حنا بغينا للمرأة حقوق ديال بصح ماشي تخرجو تغوتو حيث قالوا عليها ثريا راه ماشي عيب ايلا كانت ثريا ولكن العيب هي تبقى مقصية ونتوما كتستافدوا من هاد القضية وتبكيو مرة على أمينة ومرة على هنية عيب وعار تخلقوا مشكل والقضية وما فيها جمعية ومن وراها دعم وأموال سخية
