السر المردوم

اسيدي هدي
ياشيخي وشيخ شياخ هداوة
العيطة عليك اليوم
تحركت دياري مطلية حموم
مابقى لي فين نصد
ضاقت بي الدنيا حزين ومضيوم
شحال كدني نحكي ونعد
واهيا سيدي هدي
أطواع الوحش والسبوعة
يامول الكلمة مسموعة
في بحر مواجه تتلاطم
مديت ليك يدي
اللي طاح وحصل يودي
لاحنين يامي في ضيق الحال جاني
شفايا بين الناس فرادي مجلي
تودرت بين الطركان غريب وبراني
في عكوب الليل جاني منك رقاص
حامل لي رزمة محزمة
فيها حوايج الديعة والسيحة
دربالة مرقعة
بريق لتاي والدكة
عصا جبوجية مزوقة
منكاش لكليع الشوك والزاج
ركيلة باش نكاد لمزاج
ودعدوع وناس لمالين الحال
يطنطن بألف حكمة وموال
بين طيات الدربالة
لكيت وصية بسمق زعفراني مكتوبة
من شيخنا مول السر المكمول
اللي تكول فيه يولي مهبول
برهانه في تطاون نطق ودوى
خلا شانه فيها يعلى ويضوى
اللي يقتل لهوام ماشي إنسان
الهداوي كامي ليعته مايتكلم
مسافر في ملك الله مغطي عريان
الهداوي مايخدم مايردم
في الذل والسعاية
نسى راسه في لمراية
هذا حكام الهداوي
فيما راح الليل يبات
سايح مدربل بلاحطات
مابقى باغي ولاد ولامال
باغي لهنا وراحة البال
العطفة وليغارة
اسيدي هدي
أغياث صحابه في الضيقات
المعنك وليداته في الحزات
اللي شاف حال الهداوي
يطلب لعفو والتسليم
اللي تعجب وضحك عليه
شوكه يدك فيه
هاذي دعوى كفافيه من شيخنا لحكيم
نبالها واصلة ترشك في مولاها
من بعد الفخمة يبات ويصبح عديم
وسمع ياهذا آش يكول الدعدوع
على محاين مروية دم ودموع
اللي ماهوله حر الجمر
ولاهمه طولة لعمر
هرب سلاح وبارود
بين شعاب وحدود
أوصل شلا مراسل حربية
لهل العز سيادي لمجاهدية
باش لبلاد تتحرر
ويبان ضو لفجر
مايعرف بحق الهداوي
واللي شك في هاذ الشي
يقرى رسوم من كان على سيرته شاهد
حكاية بقات تتوارث من جد لحفاد
وهكذا هزني الشوك لجامع لفنا
بغيت نزور ونشوف مول لحمامة
سليل هداوة باش يحكي لينا
قصة هديم الحوش في أرض جبالة
لكيت الروح خرجت وداها مولانا