ها الأجواء قبل ماتش الرجاء المحمدية فالجديدة: تعزيزات أمنية فلوطوروت بين كازا والجديدة ومحيط التيران والرجاويين مقاطعين الماتش

غيتلعب ماتش الرجاء الرياضي وشباب المحمدية اليوم الاحد فتيران العبدي فالجديدة، وسط حضور قليل ديال جماهير الفريق الأخضر.
وقبل تقريبا ساعة ونص من انطلاق الماتش بين الرجاء الرياضي وشباب المحمدية، اللي غيبدا مع 3 د النهار بملعب العبدي فالجديدة، كاينة ترتيبات أمنية من السلطات ديال الجديدة فمحيط الملعب والشوارع اللي كتدي له وحتى لوطوروت فيها ترتيبات ديال جوندارم على قبل المباراة باش تدوز فأحسن الظروف ولكن راه الحضور قليل بزاف ديال جماهير الرجاء الرياضي والالترات قررو يقاطعو الماتش بسبب ثمن التذاكر اللي دارت إدارة الخضرا.
وكانت إدارة الرجاء الرياضي طرحت تذاكر الماتش ضد شباب المحمدية الويكاند اللي فات وحددت الثمن ديالها ما بين 70 درهم كأرخص تذكرة و1000 درهم كأغلى تذكرة، ودابا يالاه تابعت ما بين 200 و300 تذكرة.