جاوب يحيى جبران كابيتان الوداد الرياضي المشككين ورد عليهم، بعدما راجت الهضرة على أنه ما بغاش يلعب ماتش الفريق ضد يوسفية برشيد البارح الاحد، برسم منافسات البطولة الاحترافية وأنه واقع شي مشكل فالفيستيير وهو طرف فيه، ونفى هذا الشي. نجم الوداد الرياضي تفاعل فالساعات الأولى من صباح اليوم الاثنين، بعدما سالا الماتش ضد يوسفية برشيد، وأكد أن السبب اللي خلاه ما يلعبش الماتش هي الإصابة، وصور رجليه وحطها فسطوريات على أنستغرام، والصور اللي حط كتبان فيهم رجليه منفوخة وزگة وفحالة ما تسمحش ليه باللعب. وغاب يحيى جبران بشكل مفاجئ على تشكيلة الوداد الرياضي ضد يوسفية برشيد، وهذا الشي خلا الهضرة تدور على أنه ما بغاش يلعب، ولكن مباشرة ملي سالا الماتش سول موقع "گود" المدرب المؤقت للوداد رضوان الفالحي، وكشف على أن جبران توعت فالحصة التدريبية الأخيرة قبل الماتش، داكشي على ما لعبش المباراة ضد برشيد.