أكد يحيى جبران الكابيتان ديال الوداد الرياضي أن الخسارة أمام كلاكسي البوتسواني بواحد لزيرو فأول جولة من كروبات دوري أبطال إفريقيا صعيبة على كاع الوداديين، وأنهم خاصهم يزيدو يخدمو باش يكونو احسن، وبلي الفريق مكانش فاليوم ديالو وما يستاهلش الرباح. وتحدث كابيتان الوداد بشجاعة بعد الخسارة مع كلاكسي البوتسواني وما تخباش ورا داكشي اللي كيروجو له شي وحدين بأن الخسارة هي بسبب سحور رشوه البوتسوانيين فالتيران، وقال جبران: "الهزيمة قاسية لنا ولكاع مكونات النادي ولكن مزيان اللي جات فهاد الوقت باش بناد يراجع نفسو كثر ويزيد يخدم كثر". وكمل جبران: "كنا كنتمناو شي 3 بوان اللي تعطينا حافز اكثر وتخلينا نخدمو وحنا مرتاحين، ولكن اليوم ما قدمنا حتى حاجة باش نقدرو نربحو الماتش، خاص مازال الخدمة وبنادم يحط رجلو فالأرض ونخدمو كثر إذا بغينا نكونو فالماتشات الجايين احسن". وزاد جبران: "كيبقاو أخطأ فالكورة وما كنلومو حتى واحد ولكن كمجموعة ما درناش داكشي اللي خاصو يدار وهادي يالاه البداية وأول مباراة ومزيان لنا حيث جات فهاد الوقت اللي مازال نداركو فيه الموقف وخسارة اليوم ما عندها علاقة بخسارة فينال السوبر ليك".